गुंगू पार्टीपाखें सरकारया विरोधय् सभा
एनेकपा (माओवादीं) सर्वसत्तावाद लादे यायेत स्वःगु धासें विपक्षी गुंगू दलं विरोध सभा यात । सहिद दिवसया अवसर लाकाः विपक्षीतय्सं सहिद गेटय् विरोध सभा याःगु दु ।
उगु विरोध सभाय् नेकाया महामन्त्री प्रकाशमान सिंह, केन्द्रीय सदस्य नविन्द्रराज जोशी, एमालेया नेतात केपी शर्मा ओली, कृष्णगोपाल श्रेष्ठ लगायत मेगु गुंगू पार्टीया वरिष्ठ नेतातय्सं सम्बोधन यानादीगु खः ।
सम्बोधन याःपिं नेतातय्सं आः माओवादीया गठवन्धन सरकारयात कडारुपं सतक आन्दोलन यानाः चीकाः छ्वय्गु खँय् विशेष बः बिउगु खः । नापं माओवादीया नेतृत्वय् दुगु सरकारं गाक्कं हे अनियमिता याःगु खँय् नं थीथी पार्टीया नेतातय्सं कडा आलोचना याःगु खः ।
माओवादीया सरकारं सारा जनतायात झंग ल्हानाच्वंगु धासें विपक्ष दलतय्सं माघ २६ गते खुल्लामञ्चय् न्ह्याकेगु वृहत आमसभाय् सहभागी जुयादीत नं इनाप याःगु दु ।
