देशयात निकास बीत प्यंगू दल असफल : राई
संघीय समाजवादी पार्टीया नायः अशोक राईं मुलुकयात निकास बीत मू मू प्यंगू राजनैतिक दलत ताःमलायेधुंकूगु धयादीगु दु । वय्कलं प्यंगू दल असफल जुइधुंकूगुलिं आवश्यक जूसा देशयात निकास बीत थः प्रधानमन्त्री जुइत तयार दुगु धयादिल ।
रिपोर्टस क्लब नेपाल सोलुखुम्बुइ याःगु साक्षात्कार ज्याझ्वलय् नेता राईं प्रतिपक्षी दलतय्सं क्वःछिउम्ह प्रधानमन्त्रीया उम्मेदवार कांग्रेस सभापति सुशील कोइरालायात प्रधानमन्त्रीया रुपय् स्वीकार यायेमफइगु नं धयादिल । वय्कलं सहमतीय सरकार दयेकेगु लागि आः न्हूगु कुतलं सहमति मालेमाःगु धयादिल ।
नायः राईं देश व देशय् न्ह्यानाच्वंगु राजनीतिक गतिरोध अन्त्यया लागि संविधानसभाया पुनःस्थापना हे दक्कलय् बांलाःगु विकल्प जूगु धयादिसें संविधानसभा पुनःस्थापना यायेत मेमेगु दलत तयार मजूसा संघीय समाजवादी पार्टीं आन्दोलनया धाकुफय् हयाः संविधानसभा पुनःस्थापना यानां त्वःतेगु दावी यानादिल ।
