आन्दोलनय् सशक्त भूमिका म्हितेत एमालेपाखें निर्देशन
नेकपा (एमालें) प्रधानमन्त्री डा. बाबुराम भट्टराईयात आन्दोलनपाखें हे सत्ताच्यूत यायेत न्ह्यानाच्वंगु आन्दोलनय् सशक्त भूमिका म्हितेत क्वय्च्वंगु निकाययात निर्देशन बिउगु दु । नापं लोकतान्त्रिक पद्दतियात संस्थागत यायेगु पलेसा निरंकुशता व सर्वसत्तावाद क्वचिनेत वर्तमान सरकार उद्दत जूगु धासें एमालें कडा संघर्षया विकल्प मदुगु नं ठहर याःगु दु ।
केन्द्रीय कमिटी, समन्वय कमिटी, केन्द्रीय विभाग व जनवर्गीय संगठनलिसे परामर्श यायेगु झ्वलय् शीर्ष नेतातय्सं आन्दोलनयात अझ सशक्त यायेत छधी जुइमाःगु खँय् नं बः बिउगु दु ।
येँया बल्खुइ च्वंगु पार्टी ज्याकुथिइ जूगु ज्याझ्वलय् नायः झलनाथ खनाल, वरिष्ठ नेता माधव कुमार नेपाल, न्वकू,बामदेव गौतम, नेता के पी शर्मा ओलीं दण्डहिनता, भ्रष्टाचार व निरंकुश शैलिं न्ह्याःवनाच्वंम्ह प्रधानमन्त्री डा. भट्टराईयात सही लँपुइ हयेत संघर्ष यायेमाःगु धाःगु दु ।
