सम्पति विवरण पेश् मयापिं मन्त्रीत सु सु खः ?
आर्थिक दँ २०६८/०६९ या सम्पति विवरण पेश यायेत बियातःगु ईया दुने नं थःगु सम्पत्ति विवरण लःम्ल्हापिं मन्त्री व उच्चपदस्थ अधिकारीतय् नां राष्ट्रिय सतर्कता केन्द्रं सार्वजनिक याःगु दु ।
बिहीवाः छगू पत्रकार सम्मेलन यानाः सतर्कता केन्द्रं विवरण पेश मयापिं विशिष्ट व्यक्तितय्गु नां व उपिं ज्या यानाच्वंगु मन्त्रालय व विभागया नां सार्वजनिक याःगु खःसा इमित कारवाहीया निंतिं अख्तियार दुरुपयोग अनुसन्धान आयोगय् पत्र व्छवःगु दु ।
सतर्कता केन्द्रया कथं विवरण पेश मयापिं मन्त्रीत पोष्टबहादुर बोगटी, टोपबहादुर रायमाझी, वर्षमान पुन 'अनन्त', राजकिशोर यादव, केशवमान शाक्य व यदुवंश झा दु । अथेहे निजामती पाखें राजपत्र प्रथम श्रेणीया अधिकृतत नवराज भण्डारी (सामान्य प्रशासन मन्त्रालय, अतिरिक्त समूह), नारायणप्रसाद श्रेष्ठ (पुनरावेदन सरकारी वकिल ज्याकू, नेपालगञ्ज), हरि पौडेल (समाज कल्याण मन्त्रालय), गोविन्दप्रसाद शर्मा (कृषि सञ्चार केन्द्र, हरिहरभवन), मोहनबहादुर कार्की (महान्यायाधिवक्ताया ज्याकू), तनुक लाल यादव (सतक विभाग) व गणेश राईं (सामान्य प्रशासन मन्त्रालय) सम्पत्ति विवरण पेश मयाः ।
भ्रष्टाचार निवारण ऐन २०५५ व अख्तियार दुरुपयोग अनुन्धान आयोग ऐन २०४८ कथं सार्वजनिक पद धारण यानाच्वंपिं पदाधिकारीतय्सं थःगु व थःगु छेँजःया नांमय् दुगु सम्पतिया स्रोत व निस्सा नापंया सम्पतिया विवरण आर्थिक दँ अन्त्य जुगू खुइन्हुया दुने सरकारं क्वःछिनातःगु निकायलय् पेश यायेमा ।
