थनिंनिसें जलस्रोत समितिया मंकाः मुँज्या न्ह्यात
नेपाः-भारत दथुइया जलश्रोत समिति (जेसिडब्लुआर)या न्हय्क्वःगु मंकाः मुँज्या थनिंनिसें येँय् न्ह्याःगु दु ।भारतपाखें विद्युत कटौती यायेगु व हाकनं बीगु ज्या न्ह्यानाच्वंगु लिसे भारतीय लगानीइ निर्माण जुयाच्वंगु आयोजनाय् विवाद खनेदुगु इलय् जलश्रोत मुँज्या न्ह्याःगु खः ।
विद्युत व्यापार सम्झौता मुख्य एजेण्डा जूगु मुँज्याय् पञ्चेश्वर बहुउद्देश्यीय आयोजना लिसे खुसि नियन्त्रणबारे सहलह जुइगु ऊर्जा छ्याञ्जे हरेराम कोईरालां जानकारी बियादीगु दु ।
मुँज्याय् नेपाःयापाखें ऊर्जा, परराष्ट्र नापं सिंचाई मन्त्रालयया थीथी आयोजनाया प्रतिनिधिलिसे झिंन्हय्म्ह दुजः लिसे भारतया जल संसाधन मन्त्रालयया छ्याञ्जे ध्रुव विजय सिंहलिसे झिंछम्ह दुजः दुगु पुचलं ब्वति कयाच्वंगु दु ।
निन्हुतक न्ह्याइगु मुँज्याय् व्यापार सम्झौतालिसे थप विद्युत आयातया नापनापं अन्तरदेशीय प्रशारण लाइन निर्माण, सप्तकोशी उच्च बाँध लिसे सुनकोशी कमला डाइभर्सनया अध्ययन, नौमुरे जलविद्युत आयोजना, कोशी, गण्डक, पश्चिम राप्त बहुउद्देश्यीय आयोजना लगायतया आयोजनाबारे सहलह जुइगु ज्याझ्वः दु ।
