नेपालय् दकलय् अप्व मिसा श्रमिक
अन्तराष्ट्रिय श्रम संगठनं (आइएलओ) याःगु छगू अध्ययन कथं दक्षिण एसियाली देय् मध्ये नेपालय् दकलय् अप्व मिसा श्रमिक दुगु क्यंगु दु । नेपालय् ८० प्रतिशत मिसां श्रमिक कथं श्रम ज्या यानाच्वंगु व थुगु ल्याः मेमेगु देय्या स्वयां ६० प्रतिशत अप्वःगु खँ न्ह्यथंगु दु ।
उगु अध्ययन कथं अफगानिस्तानय् दकलय् म्हो जक मिसा श्रमिक दु । अन १५ प्रतिशत मिसां जक ज्या यानाच्वंगु दु । अध्ययन कथं बंगलादेशय् ६०, माल्दिभ्सय् ५९, श्रीलंकाय् ३८, भारतय् २५ व पाकिस्तानय् २२ प्रतिशत मिसात श्रमिक कथं ज्या यानाच्वंगु दु ।
अथेहे मिजं श्रमिकय् नं नेपाल न्ह्यने दु । नेपालय् ९० प्रतिशत मिजं श्रमिक दुसा माल्दिभ्सय् ७९, श्रीलंकाय् ७९, भारतय् ८०, पाकिस्तानय् ८१ व अफगानिस्तानय् ८० प्रतिशत दुगु तथ्यांक पितबिउगु दु ।
आइएलओं वाःया १० घन्टा अप्व सक्रिय रूपं ज्या याइपिंत श्रमिक कथं कयातःगु दु ।
