विपक्षीतय्सं एमाओवादीया दैलेख ज्याकुथी मि च्याकाबिल
दैलेखया एमाओवादी जिल्ला ज्याकुथी विपक्षी दलया कार्यकर्तातय्सं मि तयाः च्याका बिउगु दु । विपक्षीतय्सं ज्याकुथि दुगु दक्वं भ्वं व फर्निचर च्याका बिउगु खः ।
प्रदर्शनय् पिंहा वपिं विपक्षी दलया कार्यकर्तातय्त लक्षित यानाः प्रहरीं अश्रुग्यास व हवाई फायर यायेधुंकाः आक्रोशित प्रदर्शनकारीं एमाओवादी ज्याकुथि तोडफोड याःगु खः । झडपया झ्वलय् छुं प्रदर्शनकारीत घाःपाः जुगू खँ विपक्षी दलया नेतातय्सं धाःगु दु । अन अझ नं तनाव जुयाच्वंगु व स्थिति नियन्त्रणय् कायेत आपालं सुरक्षाकर्मी परिचालन याःगु दु । नापं अन माओवादी व विपक्षी दलया कार्यकर्तात दथुइ भिडन्त जुइफइगु धासें प्रशासनं सुरक्षा व्यवस्था कडा याःगु दु ।
एमाओवादीया जिल्ला सम्मेलनय् ब्वति कायेत दैलेख वःपिं माओवादीया शीर्ष नेतातय्त विरोध यायेगु कथं प्रतिपक्षी दलतय्सं बुधवाः जिल्लाय् बन्दया घोषणा नापं प्रदर्शन याःगु खः । विपक्षीतय्सं प्रधानमन्त्री डा. बाबुराम भट्टराईयात दैलेख जिल्ला दुक्याके मबिइत मंगलवाःनिसें जिल्ला बन्दया आह्वान याःगु खः ।
