सर्वोच्च अदालतय् थौंनिसें खुम्ह न्यायधीश
सर्वोच्च अदालतय् थौंनिसें खुम्ह जक न्यायधीश ल्यं दइगु जूगु दु । न्यायधीश प्रकाश वस्तीया कार्यकाल म्हिगःनिसें क्वचायेवं सर्वोच्च अदातलय् खुम्ह जक न्यायधीश जूगु खः ।
न्यायधीश वस्तीं अवकाश कायेवं प्रधानन्यायधीश खिलराज रेग्मी व न्यायधीशपिं दामोदर प्रसाद शर्मा, रामकुमार प्रसाद शाह, कल्याण श्रेष्ठ, गिरिशचन्द्र लाल व शुशिला कार्की याना खुम्ह जक जूगु खः । निलायादुने सर्वोच्च अदालतपाखें न्हय्म्ह न्यायधीशं अवकाश कायेधुंकूगु दु ।
न्यायधीशया ल्याखय् कमी वयेवं सर्वोच्च अदालतया न्याय सम्पादन प्रभावित जूगु दु । सर्वोच्चय् आः थ्यंमथ्यं झिंन्याद्वः धइथे मुद्दा विचाराधिन अवस्थाय् दु । थ्व ल्याः न्हियान्हिथं अप्वयाः वनाच्वंगु दु ।
छगू इलय् सर्वोच्चय् झिगू ईजलास गठन याइगु व फुक्क ईजलासय् सुनुवाई जुइगु खः, तर आः खुम्ह न्यायधीश जक दुगुलिं संयुक्त ईजलास दुबलय् नं सर्वोच्च अदालतय् मुक्कं स्वंगू जक ईजलास गठन जुइगु जूगु दु ।
