कांग्रेस व एमालेयात संघीयता व पहिचानपाखें 'एलर्जि' : प्रचण्ड
एनेकपा (माओवादी)या नायः पुष्पकमल दाहाल 'प्रचण्डं' नेपाली कांग्रेस व नेकपा (एमाले)या शीर्ष नेतातय्त संघीयता व पहिचानपाखें 'एलर्जि' जूगु खँ धयादीगु दु । वय्कलं संविधानसभा विघटन न्ह्यः निगू दलया नेतातय्सं थुगु खँय् सहमति मयायेत अनेक बहाना दयेकूगु धयादिल ।
येँय् जूगु छगू ज्याझ्वलय् न्ववानादिसें प्रचण्डं संविधानसभा छगू हे कारणं भगं जूगु व उगु कारण धइगु संघीयताया विषयलय् जूगु असहमति हे खः धयादिल । शीर्ष नेतातय्सं संघीयताया विषयलय् सहमति यायेमफयेवं थःम्ह उकीयात लोकतान्त्रिक मान्यता कथं संविधानसभाया फुल हाउसय् यंकेत तयागु प्रस्ताव कांग्रेस व एमालें माने मयागु धयादिल ।
'हिया खुसीबा वयेफु तर संघीयता व पहिचानया मुद्दा संविधानसभाया फुल हाउसय् यंकेबिइमखु' धकाः कांग्रेस व एमालेया नेतातय्सं धाःगु खुलासा नं प्रचण्डं यानादिल ।
नापं संविधानसभाया अन्तिम न्हि कुन्हु बहनी १० बजे जूसां संविधानसभाया बैठक च्वनेनु धकाः धयागु इलय् एमाले नेता माधव कुमार नेपालं 'संविधानसभाय् मिसा सभासाद्त शीर्ष नेतातय् मिखाय् मल्ता ह्वलेत च्वनाच्वंगु दु, अज्याःगु थासय् छु सीत वनेगु ला?' धकाः थःत न्ह्यः तःगु नं वय्कलं धयादिल ।
