बारया अध्यक्षय् प्रगतिशील प्यानलया कार्की त्यात
नेपाल बार एसोसिएसनया अध्यक्ष पदय् प्रगतिशील प्यानलया हरिकृष्ण कार्की निर्वाचित जुयादीगु दु । कार्कीं ३ हजार २ सय ५७ मत हयाः प्रजातान्त्रिक प्यानलया शेरबहादुर केसीयात ७५ मतं बुकूगु खः । केसीं ३ हजार १ सय ८२ मत हःगु खः । स्वतन्त्रपाखें उम्मेदवारी बियादीम्ह सुरेन्द्र थापा मगरं २ सय ४९ मत हःगु खः ।
स्वदँया कार्यकाल दुगु झिंन्हय्म्हेसिया कार्यसमितिइ प्रजातान्त्रिक पक्षधरं गुंगू व प्रगतिशील पक्षधरं च्यागू सिट त्याकूगु खः । न्यागू विकास क्षेत्रपाखें उपाध्यक्षय् जनक पाण्डे (पूर्वाञ्चल), टीकाराम भट्टराई (मध्यामाञ्चल), अनिता गुरुङ (पश्चिमाञ्चल), पदमप्रसाद वैदिक (मध्यपश्चिमाञ्चल) व राजेन्द्र साउद (सुदूरपश्चिमाञ्चल) निर्वाचित जुयादीगु दु ।
अथेहे महासचिवय् सुनिलकुमार पोखरेल व कोषध्यक्षय् मोहन इङ्नाम निर्वाचित जूगु दुसा दुजलय् गजेन्द्रशंकर तिमिला, गणेशप्रसाद अधिकारी, सागर विष्ट, प्रशन्नकृष्ण दास, विनिता कार्की, लक्ष्मीदेवी दाहाल, केदारप्रसाद कोइराला, सरस्वती श्रेष्ठ व राज्यलक्ष्मी बज्राचार्य निर्वाचित जूगु दु ।
थुगु निर्वाचनय् माओवादी–एमालेपाखें मंकाः प्रगतिशील प्यानल दयेकाः ब्वति काःगु खः ।
