कांग्रेसया जनजाति नेतातय्सं धाल - 'एजेण्डा बिहीन आन्दोलनयात ग्वाहालिइ याये फइमखु'
नेपाली कांग्रेसया जनजाति नेतातय्सं प्रधानमन्त्री डा. बाबुराम भट्टराईया सरकार चिकेत जक पार्टियात आन्दोलनय् ग्वाहालिइ याये मफइगु खँ धाःगु दु । एजेण्डा बिहीन आन्दोलनय् जनतातय्सं तिबः बिइ मखुगु जुया जनजाति नेतातय्सं नं आन्दोलनयात ग्वाहालिइ याये मफइगु खँ धाःगु खः । जनताया माग धाइगु एकल जातीय पहिचान दुथ्यागु संघीयता जूगुलिं थुगु माग सम्बोधन यायेत नेतृत्वयात दबाव बिउगु दु ।
बुधवाः कांग्रेस सभापति सुशील कोइराला नापं कांग्रेसया शीर्ष नेतात व जनजाति नेता दथुइ जूगु सहलहस जनजाति नेतातय्सं थःगु १४ बुँदे माग तत्काल सम्बोधन यायेत माग याःगु खः । नापं एकल जातिय पहिचान दुथ्यागु थःगु माग सम्बोधन मजुल धाःसा पार्टी दुने च्वना च्वनिगु अर्थ दइमखु धासे पार्टी त्वतेगु तकंया ख्याच्व बिउगु खः ।
उगु सहलहय् इन्द्रबहादुर गुरूङ लगायतया जनजाति नेतातय्सं एकल जातीय पहिचान दुथ्यागु संघीयताय् छुनं कथंया सम्झौता याये मफइगु खँ नं धाःगु दु । जनजाति नेतातय्सं थःपिंत नेवाः व ताम्सालिङयात छगू प्रदेश स्वीकार मजुइगु तर एकल पहिचानया आधारय् नेवाः-वाग्मति तक नामाकरण धाःसा यायेफइगु खँ धाःगु दु ।
