नेपाः राष्ट्रिय पार्टीया येँ महानगर लागाया न्हापांगु अधिवेशन
नेवाःतय्गु समस्यायात कयाः सः थ्वय्केगु आज्जु ज्वनाः व नेवाः राज्य प्राप्तिया निंतिं नीस्वंगु नेपाः राष्ट्रिय पार्टीया येँ महानगर लागाया अधिवेशन शनिवाः येँया कन्या मन्दिर उच्च मा.बि. इखापोखरी न्ह्यात ।
यें महानगर लागाया न्हापांगु अधिवेशन पार्टीया केन्द्रीय नायः नापं विज्ञान, प्रविधि तथा वातावरण मन्त्री डा. केशवमान शाक्यं त्वाः देवाः याका उलेज्या यानादीगु दु । नेवाःत छप्पं छधि मजुइकं नेवाःतय्त वःगु समस्या चीकेमफैगुलिं छप्पं जुया राजनीतिक अधिकार प्राप्ति यायेत सकलें नेवाःत न्ह्योचिलेमाःगु सः उलेज्याझ्वःस वक्तापिन्सं प्वंकूगु दु ।
ज्याझ्वलय् मूपाहांया थासं विज्ञान,प्रविधि तथा वातावरण मन्त्री डा. केशवमान शाक्यं थःम्हं सरकारय् च्वनाः नेवाः सरोकारया विषयलय् व देश विकासया निंतिं माःगु खँय् पलाः न्ह्याच्वनागु धयादिल ।
निवर्तमान सभासद बुद्ध सायमिं थम्हं संविधानसभाय् नेवाः हक अधिकारयात तिवः जूवनिकथंया भूमिका म्हितागु खँ कनादिल ।
आपालं नेवाः न्ह्यलुवाःतय्गु उपस्थिति दुगु उगु उलेज्याझ्वलय् पार्टीया संगठन विभागया कजि नरेश वीर शाक्यं थःगु अधिकार प्राप्तिया नितिं झी हे न्ह्योचिला न्ह्याःमवंक मवइगु खँय् बः बियादीगु खः । वय्कलं गवलें गवले झीगु अधिकारया खँ वइ अवले अवले इमिसं लाकमं च्वाय्गु यानावयाच्वंगु झीसं खना हे च्वना धासें थौं विकास वा लँ तब्याः याय्गु नामय् झी नेवाःत सलंसः दँ न्ह्योनिसें च्वना वयाच्वनागु छें थुना झीत पितिनेगु यानाच्वंगु दु धयादिल ।
पार्टीया मूछ्याञ्जे डा. बिजय सैंजुं न्ह्याकादीगु उगु ज्याझवःस वय्कलं विदेशी मुलुकय् अधिकारयात कुण्ठित याना राज्यसत्ता न्ह्याःवंगुलिं गुलिखय देश टुक्रा टुक्रा जुयावंगु खँ न्ह्यःथनादिल ।
अधिवेशनया उलेज्या ज्याझ्वलय् लसकुस न्वचु राजा शाक्यं बियादीगु खःसा नेवातय् विशिष्ट व्यत्तित्व सुगत रत्न कंसाकारं नं थःगु नुगः खँ तयादीगु खः । वय्कलं नुगः खँ तय्गु झ्वलय् नेवाःतय्त अग्राधिकार वइकथंया पलाः न्ह्याकेमाःगु खँय् बः बियादिल । पार्टीया न्वकु सुवर्ण केशरी चित्रकारं सुभाय् देछासें पार्टी व देय्यात थकाय्या नितिं मिसापिनिगु अहम भूमिका दुगुलिं मिसापिं जागरुक जुइमा धयादिल ।
