गच्छदार पक्षं थःगु पुचः आधिकारिक जूगु दावी
मधेशी जनअधिकर फोरमया अध्यक्ष उपेन्द्र यादवं कारवाही यानादीम्ह नेता विजयकुमार गच्छदार पक्षं थःगु पुचः आधिकारीक जूगु धासें निर्वाचन आयोगय् निवेदन पौ दर्ता याकूगु दु ।
फोरम अध्यक्ष यादवं संसदीया दलया नेत विजयकुमार गच्छदार नापं न्ह्यमेसित पार्टीं निश्कासन याःगु व स्वम्ह सभासदतय् पद खारेजी यायेत निर्वाचन आयोगयात छुं न्हि न्ह्य: पौ लःल्हावं मंगलवाः संसदीय दलया नेता व गच्छदारं केन्द्रीय समितिया झिंस्वम्ह दुजःतय् हस्ताक्षर सहित संस्थापन पक्ष जूगु दाबी यासें निर्वाचन आयोगय् निवेदन दर्ता याकूगु दु ।
मुक्कं स्वीन्याम्ह दुगु केन्द्रीय समितिया पीगू प्रतिशत दुजःतय् हस्ताक्षर सहित थःगु पक्ष आधिकारिक व संस्थापन पक्ष जूगु दाबी यासें निवेदन दर्ता याकूगु खः । नेता गच्छदारं थःगु पक्षय् बहुमत दुजःत दुगु धासें छुं दिं लिपा अझ अप्व दुजःतय् हस्ताक्षर नं लःल्हाइगु खँ धयादिल ।
अथेहे थौं हे गच्छदार पक्षं प्रधानमन्त्री माधवकुमार नेपालयात फोरमं ब्यूगु समर्थन यथावत दुगु धासें नीगुम्ह सभासदतय् हस्ताक्षर दुगु पौ लःल्हाःगु दु । फोरम सचिव मृगेन्द्रकुमार सिंहया नेतृत्वय् वंगु पुचःलं प्रधानमन्त्रीयात फोरमं सरकारयात ब्यूगु समर्थन यथावत दुगु धासें मन्त्रिमण्डल विस्तार यायेगु ज्या याकनं यायेत नं सुझाव ब्यूगु दु ।
