बढुवा जूपिं डिआइजितय्सं मुद्दा क्वःमजिउतले ज्या याये मदइगु
प्रहरी वरिष्ठ उपरीक्षक एसएसपीपाखें नकतिनि जक बढुवा जूपिं न्याम्ह नायव महानिरीक्षक डिआइजीतय्सं अदालतय् लानाच्वंगु मुद्दा क्वःमजिउतले ज्या यायेमदइगु जूगु दु । सर्वोच्च अदालतं बढुवाया कार्यान्वयन मयायेत पुष ९ गते बिउगु अन्तरिम आदेशयात मंगलवाः हाकनं निरन्तरता बीवं उमिसं मुद्दा क्वःमजिउतले बढुवा जूगु पदय् च्वनाः ज्या मदइगु जूगु खः ।
सर्वोच्च अदालतया न्यायाधीशपिं प्रकाश वस्ती व रामकुमार प्रसाद शाहया मंकाः इजलासं बढुवा सम्बन्धि प्रतिवेदनय् बिउगु ल्याः व मूल्यांकन पारदर्शी खनेमदुगु ठहर याःगु दु । अथेहे उगु इजलासं सरकारयात १५न्हुया दुने लिखित लिसः बिइत नं अदालतं आदेश बिउगु दु ।
मन्त्रीपरिषदया मुँज्यां वंगु पुष ४ गते श्याम बहादुर खड्का, नवराज सिलवाल, प्रकाश अर्याल, जयबहादुर चन्द व बम बहादुर भण्डारीयात नायव महानिरीक्षकय् बढुवाः याःगु खः ।
