एमाले-माओवादी स्वापू बांलाकेत कार्यदल गठन
एलमो व एकीकृत नेकपा (माओवादी)दथुइ स्यनावनाच्वंगु लिपांगु राजनीतिक स्वापूयात बांलाकेगु निंतिं एमाले व माओवादीया नेतात दुथ्याःगु कार्यदल गठन याःगु दु ।
मंगलवाः प्रधानमन्त्री माधवकुमार नेपाल नापं एमाले शीर्ष नेतात व माओवादीया शीर्ष नेतात दथुइगु जूगु सहलहलय् निगू दल दथुइ खनेदयाच्वंगु असमझदारी व स्वापू बांलाकेगु निंतिं माओवादी संविधानसभा दलया प्रमुख सचेतक पोष्टबहादुर बोगटी व एमाले सचेतक भीमप्रसाद आर्चाय दुथ्याःगु कार्यदल गठन याःगु खः । कार्यदलं सदन सुचारु यायेत आवश्यक सहलह यानाः सहमतिया ड्राफ्ट तयार नं याइगु जूगु दु ।
निगू दल दथुइया खँल्हाबंलाय् प्रधानमन्त्री माधवकुमार नेपालं माओवादीयात सरकारय् ब्वति कायेत नं इनाप यानादीगु ख: । तर, माओवादी अध्यक्ष पुष्पकमल दाहाल 'प्रचण्डं' धासाः राष्ट्रपितं थःगु पलाः मंभिंकूतल्ले सरकारय् ब्वति कायेमफइगु खँ धयादीगु ख: । वयेकलं देशय् नागरिक सर्वोच्चता कायम जुइधुंकाः जक एमाले नेतृत्वया सरकारयात ग्वहालि यायेगु बारे बीचाः यायेफइगु लिसः बियादीगु खः ।
माओवादी नेतात नाप खँल्हाबंला यायेत प्रधानमन्त्री नेपाल, एमाले अध्यक्ष झलनाथ खनाल व एमाले सचेतक भीमप्रसाद आर्चाय यलया गोदावरी थ्यंकादीगु खः । खँल्हाबंलाय् माओवादीया पाखें अध्यक्ष पुष्पकमल दाहाल 'प्रचण्ड', वरिष्ठ नेता डा. बाबुराम भट्टराई, मोहन वैद्य, नारयणकाजी श्रेष्ठ व संविधानसभा दलया प्रमुख सचेतक पोष्टबहादुर बोगटीं ब्वति कयादीगु खः ।
खँल्हाबंला न्ह्याः निगूलिं दलं थःथः पार्टी दुने आन्तरिक सहलह नं याःगु खः ।
