विश्वासया संकट जूगुलिं सहमति मजूगु : मन्त्री शाक्य
महेश श्रेष्ठ, धरान
राष्ट्रिय सहमतिय सरकार निर्माण यायेगु निंतिं राष्ट्रपति डा. रामवरण यादवं बियादीगु लिप्पांगु ई क्वचाःसां राजनैतिक दलत दथुइ विश्वासया वातावरण मदुलिं सहमति जुइमफुगुलिं राष्ट्रपतिं हानं म्याद थप यायेगुया विकल्प मदुगु खँ सरकारय् दुम्ह छम्ह मन्त्री धयादीगु दु ।
धरानय् शनिवाः शाक्य कल्याण संस्थाया ज्याझ्वलय् ब्वति कायेत झायादीम्ह विज्ञान, प्रविधि व वातावरण मन्त्री डा. केशवमान शाक्यं उगु खँ धयादीगु खः ।
मन्त्री शाक्यं लिप्पांगु इलय् संविधानसभाया चुनाव यायेगु वा सविधानसभाया पुनःस्थापना यायेगु धइगु विवाद जूगुलिं नं सहमति जुइमफुगु धयादिल । वय्कलं आःया सरकारं चुनाव याकूसाः विपक्षी दलत एमाले–कांग्रेसयात अनुकल मजुइगु व विपक्षीतय् नेतृत्व जूसाः उगु नेतृत्व सत्तासिन दलतय्त अनुकुल मजुइगुलिं विश्वासया संकट अप्वया वंगु धयादिल ।
राजनीतिक दलत दथुइ विश्वासया संकट दयाच्वनीगु खःसा स्वतन्त्र व्यक्तियात सरकारया नेतृत्व बियाः जूसां विकल्प मालेमाःगु खँ मन्त्री शाक्यं धयादिल ।
शाक्य कल्याण संस्थाया ज्याझ्वः लिपा शनिवाः हे मन्त्री शाक्यं धरानय् दुगु केन्द्रिय प्रविधि क्याम्पस हात्तिसार व पूर्वाञ्चल क्षेत्रीय हावापानी केन्द्रया निरिक्षण यानादिल ।
