मंकाः बलात्कारय् लाःम्ह मिसा सित
भारतया न्हू दिल्लीइ बस दुने मंकाः बलात्कार नापं आक्रमणया शिकार जूम्ह २३ दँया ल्यासेमचा वंगु चान्हय् सित । दिल्लीइ संघन उपचार कक्ष (आइसीयू) य् वासः यायेधुंकाः थप वासः यायेगु लागि सिंगापुरया माउण्ट एलिजावेथ हस्पितलय् एअर एम्बुलेन्सपाखें यंकूगु खः । वासः यायेगु झ्वलय् थौं चान्हय् नेपाःया ई कथं निताः त्याः इलय् मदुगु चिकित्सकतय्सं धाःगु दु । उम्ह ल्यासेमचाया शरिरया ब्वं बुलुहुं ज्या यायेगु त्वःतूगुलिं चिकित्सकतय्सं सीगु घोषणा याःगु खः । सीम्ह शनिवाः हे न्हू दिल्लीइ हयेगु तयारी यानाच्वंगु दु ।
२३ दँ उम्ह ल्यासेमचा सीगु खँय् दुःख प्वंकादिसें भारतीय प्रधानमन्त्री डा. मनमोहन सिंहं थुगु घटनायात कयाः थः तसकं गम्भिर जुयागु धयादिल । वय्कलं छगू सन्देश पिथनादिसें सरकार मिसा सुरक्षाया लागि न्ह्यज्यायगु धयादीगु दु । नापं आः दयाच्वंगु मिसा सुरक्षा सन्बन्धि कानूनया समीक्षा यायेगु लागि नंं पहल यायेगु धयादीगु दु ।
