नेविसंघया विद्यार्थी दथुइ ल्वापू
थःगु हे संगठनया विद्यार्थीतय्सं दाःगुलिं नेपाली कांग्रेसया भातृ संगठन नेपाल विद्यार्थी संघया पुलांम्ह दांभरि कुन्दनराज काफ्ले, केन्द्रीय दुजः ईन्दु शर्मालिसें प्यम्ह घाःपाः जूगु दु । यलया कुपण्डोलय् च्वंगु एडभान्स इन्जिनियरिंग कलेजया अधिवेशनया झ्वलय् उगु संघया निगू पक्ष दथुइ ल्वापू जूगु खः ।
घाःपाः जूपिं मध्ये काफ्ले व शर्मां थःपिन्त नेविसंघया संयोजक रञ्जित कर्ण पक्षया विद्यार्थीतय्सं आक्रमण याःगु धाःगु दु । काफ्लेयात येँया थापाथली च्वंगु नर्भिक अस्पतालय् वासः जुयाच्वंगु दु ।
उखे संस्थापन पक्षं धाःसा चुनाव याकेगु विषयस मतभेद जुइवं निगू पक्ष दथुइ ल्वापू जूगु पुष्टि यासें थःपिनिगु पक्षया सुदर्शन शर्मा व भीषण भुजेल घाःपाः जूगु न्ह्यथंगु दु ।
नेविसंघया प्रवक्ता यूपि लामिछानें काफ्ले पक्षं अवैधानिक कथं अधिवेशन याकेत स्वःगुलिं ल्वापू जूगु धाःगु दु । उगु विषययात कयाः नेविसंघया केन्द्रीय ज्याकू तकं तोडफोड याःगु दु ।
