बढुवा बदर यायेत माग यासें सर्वोच्चय् रीट
नेपाल प्रहरीया न्याम्ह वरिष्ठ उपरीक्षकयात नायव महानिरीक्षकय् बढुवा यायेगु सरकारया क्वःछिना बदर यायेत माग यासें सर्वोच्च अदालतय् रीट लाःगु दु ।
सरकारं याःगु क्वःछिनायात कयाः असन्तुष्टि प्वंकूसें बढुवाय् मलाःपिं वरिष्ठ उपरीक्षकत रवि प्रताप राणा, पूर्णसिंह खड्का, मनोहर प्रसाद रिमाल, रामकुमार खनाल, ज्ञानोदराज वैद्य व राजबहादुर विष्टं आइतवाः सर्वोच्चय् रीट दायर याःगु खः ।
आइतवाः दायर याःगु रीटय् प्रहरी नियमावलीइ व्यवस्था दुगु जेष्ठताया मापदण्ड क्वत्यलाः सरकारं थःपिंस्वयां कनिष्ठ अधिकारीतय्त बढुवा याःगु दावी यासें तत्काल उगु प्रकृयायात दिकेत अन्तरिम आदेशया माग याःगु दु ।
मन्त्री परिषदया वंगु विहिवाः च्वंगु मुँज्यां वरिष्ठ उपरिक्षकत श्याम खड्का, प्रकाश अर्याल, नवराज सिलवाल, जयबहादुर चन्द व बम बहादुर भण्डारीयात नायब महानिरीक्षकय् बढुवा यायेगु क्वःछिउगु खः ।
थ्वहे झ्वलय् विहिवाः हे बढुवा जूपिं सकस्यां दज्र्यानी चिं काःगु दु ।
