सहमतीय प्रधानमन्त्री दइगु सम्भावना अप्वल : खनाल
नेकपा एमालेया नायः झलनाथ खनालं कन्हय् तक सहमतीय प्रधानमन्त्री दइगु सम्भावना अप्वयावंगु धयादीगु दु ।
राष्ट्रपति डा. रामवरण यादवलिसे थ्यंमथ्यं निघौतकया सहलह लिपा पिहांवयेगु झ्वलय् नायः खनालं उगु खँ धयादीगु खः ।
न्याक्वः तक ई बिउसां नं मू मू दलतय्सं सहमतीय प्रधानमन्त्री ल्यये मफयेवं राष्ट्रपति डा. यादवं सहलहया लागि कन्हय् सुथय् विघटीत संविधानसभाय् प्रतिनीधित्व याःगु फु््क्क दलतय्त सःतूगु दु ।
राष्ट्रपतिलिसे नापलानाः पिहां वयेगु झ्वलय् नेपाली कांग्रेसया महामन्त्री कृष्णप्रसाद सिटौलां कन्हय्या मुँज्याय् सहमतीय सरकार व प्रधानमन्त्रीया प्रस्ताव यंकेगु जानकारी बियादिल । अथेखःसां महामन्त्री सिटौलां कन्हय् जुइगु मु्ँज्याय् प्रधानमन्त्रीइ सुया नां प्रस्ताव यायेगु व धाःसा खुलासा यानामदी ।
राष्ट्रपति डा. यादवं आइतवाः न्हिनसिया निताः इलंनिसें प्यताः ईतक मू मू स्वंगू दलत व मधेसी मोर्चाया प्रतिनीधितलिसे निकासया बारे सहलह यानादीगु खः ।
राष्ट्रपति डा. यादव भारतय् जुइगु छगू ज्याझ्वलय् ब्वति कायेत भारत वनीगु जूगु दु । थ्वहे झ्वलय् भारत वने न्ह्यः हे सहमतीय प्रधानमन्त्रीया बारे क्वःछिइत मू मू दलतय्त इनाप राष्ट्रपति डा. यादवं इनाप यानादीगु दु ।
