सहमति जुइगु सम्भावना क्षीण जुयावन
प्रधानमन्त्री डा. बाबुराम भट्टराई थःत पार्टीं चीकेगु निर्णय मयाइगु धयादीगु दु ।
विहिवाः बालुवाटारय् थःगु हे निवासय् पत्रकारतलिसे खँल्हाबँल्हा यानादिसें प्रधानमन्त्री डा. भट्टराईं उगु खँ धयादीगु खः ।
थ्वहे दथुइ सत्तारुढ दलतय्गु मोर्चा संघीय लोकतान्त्रिक गणतान्त्रिक गठबन्धनं थःपिनिगु पुलांगु अडानय् च्वंसें वर्तमान सरकारयात हे राष्ट्रिय स्वरुप बीमाःगु नं क्वःछिउगु दु ।
गठबन्धनया थुकथंया क्वःछिना लिपा दलत दथुइ हाकनं सहमति जुइगु सम्भावना क्षीण जुयावंगु दु ।
थ्वहे झ्वलय् बालुवाटारय् विहिवाः च्वंगु गठबन्धनया मुँज्यां तत्काल प्रधानमन्त्री डा. भट्टराईं पद त्वःते मजिउगु नं निष्कर्ष पिकाःगु दु ।
मुँज्या लिपा गठबन्धनया प्रबक्ता प्रेम बहादुर सिंहं थ्वहे सरकारयात राष्ट्रिय स्वरुप बीमाःगु क्वःजिउगु पत्रकारतय्त जानकारी बियादिल । थुकथं हे मुँज्यां विकल्प मालेमाःसा नं सत्तारुढ गठबन्धन दुनें हे मालेगु तकं क्वःछिउगु दु ।
