तमुवान बन्द जुल

आत्मनिर्णय सहितया संघीय तमुवान स्वायत्त गणराज्य प्राप्तिया माग तसें तमु राष्ट्रिय मुक्ति मोर्चा नेपालं थौं इनाप याःगु तमुवान राज्य बन्दया भुवलय् जूगु ल्वापुइ लानाः पोखराय् न्याम्ह घाःपाः जूगु दु । तमुतय्गु वन्दप्रति समर्थन क्यंसें स्थानीय पसःत वन्द याकाः वनाच्वंपिं अखिल क्रान्तिकारीया विद्यार्थीतय्त वाग्लुङ्ग वसपार्कय् छखा छेँय् अप्पां कयेकाः हयेवं न्याम्ह घाःपाः जूगु दु । घाःपा जूपिं मध्ये स्वम्हसित गण्डकी अस्पताल व छम्हसित फिस्टेल हस्पिटलय् वासः याकातःगु दु । तमु राष्ट्रिय मुक्ति मोर्चा नेपालं थौं याःगु तमुवान राज्य बन्दया कारण च्यागू जिल्लाया जनजीवन प्रभावित जूगु खः । बन्दया कारण तमुवानया मुख्य शहर पोखराय् छु नं सवारी साधन न्ह्याःगु मदुसा बजाः नं बन्द जूगु खः ।