पार्टीया फुक्क क्वःछिनात माने यायेत बाध्य मजुइगु
एकीकृत नेकपा माओवादीया प्रभावशाली नेता नापं शान्ति व पुनःनिर्माण मन्त्री तकं जुयादीम्ह टोप बहादुर रायमाझीं पार्टीं धायेवं फुक्क क्वःछिनात माने यायेमाः धइगु छुं नं बाध्यता मदुगु धयादीगु दु ।
रिपोर्टस क्लब नेपालं विहिवाः येँय् ग्वसाः ग्वःगु साक्षात्कार ज्याझ्वलय् न्ववानादिसें मन्त्री रायमाझीं उकथं धयादीगु खः । वय्कलं देश, जनता व पार्टीयात लिच्वः लाइगु कथंया क्वःछिउसा माने यायेमाः धइगु बाध्य मजुइगु नं धयादिल ।
मन्त्री रायमाझीं पार्टीं आःतक वर्तमान सरकारयात हे सहमतिया सरकारय् हिलेगु बाहेकया छुं नं क्वःमजिउगु धयादिसें संचारमाध्यमं मखुगु कथं प्रचारवाजी याःगु नं दावी यानादिल ।
ज्याझ्वलय् नेपाली कांग्रेसया केन्द्रीय दुजः डा. रामशरण महतं राष्ट्रपतिं सहमतिया नामय् आः हाकनं ई तनेमजिउगु धयादीगु दु । ई तनाः वार्ताया नामय् नाटक जक जुयाच्वंगु नेता महतया धापू दु ।
