सहमतिया कुतलय् पंगः मजुइगु : प्रधानमन्त्री
राष्ट्रपति डा. रामवरण यादव व प्रधानमन्त्री डा. बाबुराम भट्टराई दथुई राजनीतिक निकासया लागि बुधवाः सहलह जुल । सनिलया प्यताः इलय् शीतल निवासय् जूगु उगु सहलहस प्रधानमन्त्रीं दलत दथुइ आःतक सहमतिया लागि जुयाच्वंगु कुतःया विषयस राष्ट्रपतियात जानकारी याकूगु राष्ट्रपतिया नीजि सचिवालयं न्ह्यथंगु दु ।
राष्ट्रपतिलिसे नापलायेधुंकाः संचारकःमितलिसे खँल्हानादिसें प्रधानमन्त्री डा. भट्टराईं थः बैशाखय् संविधानसभाया चुनाव याकेगु पक्षय् दुगु धयादिल । वय्कलं दलत दथुइ न्ह्यानाच्वंगु सहमतिया कुतलय् थः छुं नं हालतय् पंगः मजुइगु नं दावी यानादिल ।
थ्वहे झ्वलय् प्रधानमन्त्री डा. भट्टराईं दलत दथुइ खँ मिलेजुयाः चुनावया लकस दयेवं थः पद त्वःतेत छुं नं समस्या मदुगु नं धयादिल ।
