गद्यगुरु पं. बज्राचार्यया बुदिं हसें लुमंकल
नेपालभाषाया प्यंगः थां मध्ये छगः मू थां गद्यगुरु पं. निष्ठानन्द बज्राचार्यया १५६ क्वःगु बुदिं थौं छगू ज्याझ्वःया दथुइ हंगु दु ।
निष्ठानन्द स्मृति गुथिया ग्वसालय् येँया ओमबहाः नकबहिली गुथिया नायः प्रा. सुवर्ण शाक्यया सभाध्यक्षताया उगु बुदिं हनेगु ज्या जूगु खः ।
ज्याझ्वलय् लसकुस यानादिसें नायः शाक्यं गद्यगुरुया बुदिं हनाः दँय्दसं वय्कःया योगदान लुमंकेगु जक मखु, वय्कःपिनिगु ज्यां हःपाः कयाः भाषिक आन्दोलनयात न्ह्याकेमाःगु धयादिल ।
ओलम्पस क्लबया नायः पवित्र बज्राचार्यं ज्याझ्वःया बारे जानकारी बियादीगु उगु ज्याझ्वलय् मूपाहां नेपालभाषा एकेदमिया चान्सलर भाषारत्न सत्यमोहन जोशीं सह प्रा. मय्जु प्रेमहीरा तुलाधरं च्वयादीगु "गद्यगुरु पं. निष्ठानन्द बज्राचार्य व ललितविस्तर" नांया सफू उलेज्या यानादीगु खः ।
मूपाहां भाषारत्न सत्यमोहन जोशीं नेवाःतय्गु स्वायत्त राज्य मवःतले छुं नं हक अधिकार काये मफइगु धयादिसें भाषिक न्ह्यलुवापिनिगु म्हगस साकार यायेत प्रत्येक नेवाःतय्के राजनीतिक चेतना ब्वलंकेमाःगु धयादीगु दु ।
ज्याझ्वलय् सहभागी जुयादीपिं भाषासेवी, च्वमि, समाजसेवी, प्रहरी व स्थानीयवासीपिन्सं पं निष्ठानन्द बज्राचार्यया झ्वाताय् श्रद्धान्जली कथं स्वां देछायादीगु खः ।
ज्याझ्वलय् सफूया च्वमि सह प्रा. प्रेमहीरा तुलाधरं नं थःगु नुगः खँ प्वंकादीगु खः ।
