'लुम्बिनीया विकासया निंतिं फूक्कं छधी जुइमाः'
अन्तर्राष्ट्रिय स्तरय् नांजाःगु लुम्बिनीया विकासया निंतिं फुक्क छधी जुइमाःगु बिचाः छगू ज्याझ्वलय् ब्वति काःपिं वक्तातय्सं प्वंकूगु दु। विश्वया म्हो जक पवित्रस्थल मध्ये गौतम बुद्धया जन्मस्थल लुम्बिनी जूगुलिं थुकिया विकासया निंतिं फुक्क पक्षया ध्यान वनेमाःगु खँ वक्तातय्सं धाःगु दु ।
मिडिया इन्टरनेशनलय् ग्वसाःग्वःगु लुम्बिनीया पत्रकारत नापलाय्गु ज्याझ्वलय् शान्ति लिसे पुनःनिर्माण मन्त्री टोपबहादुर रायमाझीं लुम्बिनीया विकासया निंतिं संस्थागत रुपय् न्ह्यःने न्ह्यायेमाःगु धयादीगु दु ।
वय्कलं लुम्बिनीइ कृषि, पर्यटन, जलविद्युत व उद्योग प्यंगुलिं सम्भावनात दुगुलिं समान रुपं फुक्क क्षेत्रया विकासय् सरकार न्ह्यःज्यानाच्वंगु खँ न्ह्यःथनादिल । मन्त्री रायमाझीं नेपाःया हे गौरब क्वःबुयाच्वंगु लुम्बिनी विकासया हिसाबं ल्यूने लाःगुलिं उखेपाखे सरकारं ध्यान बीमाःगु धयादिल ।
ज्याझ्वलय् नेपाली कांग्रेसया केन्द्रीय दुजः दिपकुमार उपाध्यायं लुम्बिनी विकासया निंतिं ब्यागलं मापदण्ड दयेकाः न्ह्यःने न्ह्यायेमाःगु धयादिल । वय्कलं लुम्बिनीया पूर्वाधार विकासय् ध्यान केन्द्रीत यायेमाःगु खँय् बः बियादिल ।
उगु हे ज्याझ्वलय् पुलाम्ह सभासद विनोद पहाडीं लुम्बिनीया प्रचार प्रसारय् अझ नं कमी दुगु धयादिसें लुम्बिनीया पत्रकारतय्सं थुखेपाखे चिउता अप्वयेकेमाःगु बिचाः प्वंकादिल ।
