गेसपेपरय् प्रतिबन्ध

सरकारं उच्च माध्यामिक तह तकया ब्वमितय्त गेसपेपर छ्यलेगु ज्याय् प्रतिबन्ध याःगु दु । मंगलवाः शिक्षा मन्त्रालय‌ं मन्त्रीस्तरीय निर्णय यानाः उच्च मावि तकया ब्वमितय्त गेसपेपर प्रतिबन्ध याकूगु खः । गेसपेपर प्रतिबन्धित यासां गाइड बुकय् धाःसा प्रतिबन्ध तःगु मदु । ब्वमितय्सं सफुसिबें गेसपेपरय् ध्यान बिइगु व सिर्जनशीलता हये मफुगुलिं प्रतिबन्ध यानाःगु खँ शिक्षा सचिव सुरेश बहादुर श्रेष्ठं कनादीगु दु । ब्वमितय्तं सफु ब्वंकेगु बानी विकासया निंर्तिं गेसपेपर प्रतिबन्ध यानागु खँ श्रेष्ठं कनादिल । नेपालय् कक्षा १० निसें १२ तकया अधिकांश ब्वमित गेसपेपरय् निर्भर जुयाच्वंगु दु ।

मन्त्रालयं बाजरय् दुगु गेसपेपर चिकेत छगु संयन्त्र गठन यानाः अनुगमन यायेगु खँ धाःगु दु । पिथने धुंकूगु गेसपेपर पसलय् वनाः मतयेत निर्देशन बिइगु, प्रकाशन गृह व बिक्रेतायात चिकेत निर्देशन बिइगु, अन लिपा नं मानेमजुसा पसः जफत तकं यायेगु खँ मन्त्रालयं धाःगु दु । नापं छवाः दुने गेसपेपर चिकेत सरोकारवालातय्त‌ सुचं सार्वजनिक यायेगु खँ धाःगु दु ।