साँगीतिक जुलुस
नागरिक सर्वोच्चताया नितिं देशव्यापी आन्दोलनया घोषणा याःगु एकीकृत नेकपा माओवादी व भातृ संगठनतय्सं थौं नं आन्दोलनयात निरन्तरता ब्यूगु दु । विरोध ज्याभुवः अन्तरगत अखिल नेपाल जनसाँस्कृतिक महासँघं देय्न्यंकलं विरोधया ज्याभुवः ग्वसाः ग्वःगु दु । थौं महासंघं येँ साँगीतिक जुलुस पिकाःगु खः । महासँघ आबद्ध कलाकारतय्सं शान्ति बाटिकाय् मुनाः सांगीतिक जुलुस पिकाःगु खः । सांगीतिक जुलुशलिपा ग्वसाः ग्वःगु कोणसभायात महासंघया केन्द्रीय नायः ईश्वरचन्द्र ज्ञवाली लगायतं सम्बोधन यानादीगु खः । सभाय् प्रगतिशील कवि कलाकारतय्सं थःथःगु साँगीतिक न्ह्यब्वःगु खः । अथेहे जनसाँस्कृतिक महासंघं थौं यलय् सनिलया प्यताः इलय् व ख्वपय् सनिलया न्याताः इलय् विरोध ज्याभुवः याःगु दु । जुलुसय् चलचित्रकर्मी जनकलाकारत व द्धलंद्धः जनसाधारणया ब्वति दुगु महासंघया केन्द्रीय दुजः राजन बमं जानकारी बियादीगु दु ।
अथेहे म्हिगः ताम्सालिङ बन्दया भुवलय् एकीकृत नेकपा माओबादीया काभे्र जिल्ला कार्यालय तोडफोड याःगु विरोधय् बनेपाय् थौं माओबादीं जनप्रदर्शन याःगु दु । तोडफोडया क्षतिपुर्ति बिइमाःगु घाःपाः जूपिंत वासः खर्च बिइमाःगु तोडफोडय् संलग्नतय्त कारवाही यायेमाःगु माग तसें माओबादी कार्यकर्तां प्रदर्शन याःगु खः । प्रदर्शनया भुवलय् आक्रोशित भिडं नेकपा एमालेया जिल्ला कार्यालय समेत तोडफोड याःगु दु ।
