जनजातितय्सं जनगणना २०६८ च्याकल
राष्ट्रिय जनगणना २०६८ तथ्यांक मजूसें मिथ्यांक जूगु धासें नेपाल आदिवासी जनजाति महासंघं जनगणनाया प्रतिवेदन च्याकूगु दु ।
महासंघं येँया थापाथलीस्थित केन्द्रीय तथ्यांक विभाग पिने धर्ना बियाः प्रतिवेदन च्याकूगु खः । येँ नापं जनजाति महासंघं १०गू जिल्लाय् विरोध प्रदर्शन नापं प्रतिवेदन च्याकूगु दु । अथेहे प्रधानमन्त्रीयात सम्बोधन यानातःगु माग सहितया ज्ञापनपौ केन्द्रीय तथ्याङ्क विभागया महानिर्देशक उत्तमनारायण मल्लयात लःल्हाःगु दु ।
जनजातितय्सं थुगुसीया जनगणनाय् थीथी झिंनिगू जनजाति समुदाय दुमाथ्याकूगु नापं जनजातितय् ल्याः म्हो जक क्यनाः पहिचान सहितया संघीयता निर्माण यायेगु मुद्दायात कमजोर दयेकेत स्वःगु द्वपं बिउगु दु ।
थुगुसीया जनगणनाय् जनजातितय् ल्याः ३५% जक क्यनातःगु दुसाः २०५८या जनगणनाय् ३७.२% जनसंख्या दुगु खः ।
