वेपत्ता नागरिक मालेत कुतः
एकिकृत नेकपा माओवादीया वरिष्ठ नेता सीपी गजुरेल गौरवं बेपत्ता नागरिकतय्गु विषयसं संवैधानिक तरिकां समस्याया समाधान मालेत कुतः यायेगु व उकियात बेवास्ता याःसा विकल्पयारुपं संघर्षयात न्ह्यःने न्ह्याकेगु धयादीगु दु । थौं जनसंचार अभियानय् राज्यपाखें बेपत्ता योद्धा परिवार समाजं याःगु ज्याभुवलय् न्वंवानादिसें नेता गौरवं उगु खँ धयादीगु खः ।
रायमाझी आयोगं समेत रुक्माङगद कटुवाल लगायतयात दोषी ठहर यायेधुंकूगुलिं पत्ता लगय् जुइधुंकूपिं अपराधीयात कारवाही यायेमाःगुलि बह ब्यूगु दु । ज्याभुवलय् नागरिक समाजया अगुवा डा. सुन्दरमणि दिक्षितं सैनिक सर्वोच्चताया न्ह्यःने पुलिं चूगु सरकारं बेपत्ता नागरिक सार्वजनिक यायेमफइगु दाबी यासें बेपत्ता नागरिक सार्वजनिकया छगू जक विकल्प संघर्ष जूगु धयादीगु दु । नेपाली कुग्रेसया नेता रमेश लेखकं नागरिक वेपत्ता यायेगु गंभीर अपराध जूगु धयादीगु दु ।
नागरिक बेपत्ता सम्वन्धी थ्व स्वयां न्ह्यःया सरकारं हःगु अध्यादेशय् त्रुटी खनेदुगुलिं उकियात भिंकेमाःगु धयादीगु दु । ज्याभुवलय् नेकपा एमालेया नेता भीम आचार्य व माओवादीया जयपुरी घर्तीं नागरिक बेपत्ता यायेगु दुःखद् जूगु धासें अपराधीयात सजाँय बिइमाःगु धयादीगु खः ।
