सङ्घीय समाजवादी पार्टीया घोषणा
नेकपा (एमाले)या पुलाम्ह उपाध्यक्ष अशोक राईया नेतृत्वय् सङ्घीय समाजवादी पार्टीया घोषणा जूगु दु । एकल जातीय पहिचानया आधारय् राज्यया पुनर्संरचना जुइमाःगु मू नारा ज्वनाः उगु पार्टी नीस्वंगु खः । घोषणा सभाय् पार्टीया घोषणापत्र व ध्वाँय् नं सार्वजनिक याःगु खः ।
येँया नेपाः ब्याङक्वेटय् छगू ज्याझ्वःया दथुइ ८म्ह उपाध्यक्ष, १म्ह महासचिव, ३म्ह उपमहासचिव व ५म्ह सचिव यानाः ९७म्हेसिया तदर्थ कार्यसमिति घोषणा याःगु खः ।
पार्टीया उपाध्यक्षय् विजय सुव्वा, दुर्गामणी देवान, प्रेमकृष्ण पाठक, वीरवहादुर लामा, रकम चेम्जोङ, हेमराज राई, मोहम्मद रिजवान अन्सारी व गोपाल ठाकुर च्वनादीगु दु ।
अथेहे महासचिवय् राजेन्द्र श्रेष्ठ उपमहासचिवय् अजम्वर राई काङमाङ, राधा तिमिल्सिना व नोर्साङ लामा दी । मिना गुरुङ, होरीलाल चौधरी, कर्णवहादुर वुढा मगर, रामसिं यादव व डीबी नेपाली सचिव कथं च्वनादीगु दु ।
