संविधानसभा बैठक
संविधानसभाया थौंया बैठकय् म्हिगः न्ह्यब्वःगु अल्पङ््ख्यक तथा सिमान्तकृत समुदायया हक अधिकार संरक्षण समितिया अवधारणापत्र व प्रारम्भिक मस्यौदा सम्बन्धी प्रतिवेदन २०६६ दथुइया सहलह न्ह्याःगु दु । प्रतिवेदन मस्यौदा समितिया सभापति लालबाबु पण्डितं न्ह्यब्वःगु उगु प्रतिवेदनया सहलहसं एकीकृत नेकपा माओवादीया सभासद् अमिक शेरचनं अल्पसङ्ख्यक समुदायया सहमतिबिना संविधानया भावना पूर्ण मजुइगु न्ह्यथंसें संविधान निर्माणया नितिं राष्ट्रिय सहमति जुइमाःगु धयादीगु दु । नेपाली काङ्ग्रेसया जगदीश नरिसंह के।सीं। गुलि जनसङ्ख्या दुगु जाति अल्पसङ्ख्यक लोपोन्मुख जाति खः धइगु खँ स्पष्ट जुइमाःगु सिमान्तकृत समुदायं लोपोन्मुख जातियात कःमघाइगु जूगुलिं संविधानय् लोपोन्मुख जाति नं न्ह्यथनेमाःगु खँय् बह बियादीगु दु । नेकपा एमालेया अग्निप्रसाद खरेलं जातीय धार्मिक तथा भाषिक अल्पसङ्ख्यक पुयायेमाःगु उमिगु सहमतिइ संविधान निर्माण यायेमाःगु व अङिगकृत नागरिकता बिइगु प्रावधान दिकेमाःगु धयादीगु दु । नेकपा मालेया चन्द्रप्रकाश मैनालीं नेपालय् छगू करोड खस समुदाय आदिवासी जनजाति व अल्पसङ्ख्यक दुगुलिं उमिगुबारे संविधानय् न्ह्यथनेमाःगु अल्पसङ्ख्यक सिमान्तकृत समुदाययाबारे संविधानय् विशेष व्यवस्था जुइमाःगु धयादीगु दु ।
एकीकृत नेकपा माओवादीया सुरेशकुमार आलेमगरं जातीय आधारय् स्वयां सङ्ख्याया आधारय् अल्सङ्ख्यक समुदाय पुयायेमाःगु अल्पसङ्यक वा बहुसङ्ख्यक जूसां नं अधिकारपाखें बंचित जूपिंत अधिकार बिइमाःगु फुक्क भाषायात समान मान्यता बिइमाःगु खँय् बह बियादीगु दु ।
