विपक्षी दलतपाखें नागरिक समाजलिसे अन्तरक्रिया
राष्ट्रिय सहमतिया सरकार निर्माणया माग यानाः आन्दोलनय् कुहांवःगु कांग्रेस–एमाले लगायतया विपक्षी दलतय्सं मेगू चरणया सरकार विरोधी आन्दोलनया घोषणा याःगु दु आन्दोलनया न्हापांगु चरणया न्हापांगु दिं शनिवाः विपक्षी दलतय्सं नागरिक समाजया न्ह्यलुवाःपिंलिसे अन्तरक्रिया यात ।
‘सर्वसत्तावाद व निरंकुशता विरुद्ध आन्दोलन याये, राष्ट्रिय सहमति निर्माण याये’ धइगु मू नारालिसे यायेत्यंगु आन्दोलनयात कयाः विपक्षी झिंखुगू दलं नागरिक समाजलिसे अन्तरक्रिया यानाः आन्दोलनय् ग्वाहालि यायेत इनाप याःगु खः । अन्तरक्रिया ज्याझ्वलय् विपक्षी दलया नेतातय्सं सरकार विरुद्ध आन्दोलनय् वनेमाःगु हुनिया बारे प्रष्ट यायेगु कुतः याःगु खः ।
अन्तरक्रिया ज्याझ्वलय् नागरिक समाजया न्ह्यलुवाः सुन्दरमणि दिक्षितं संविधान दयेके मफया प्रधानमन्त्री डा. बाबुराम भट्टराई नालायक साबित जूगु धयादिल । भट्टराई सरकारय् प्यपुना च्वंगुया हुनि थःम्हं थुइके मफुगु धयादिसें वय्कलं वर्तमान सरकार चीकेमाःगु धयादिल। वय्कलं सत्ता लिप्सा व भ्रष्टाचारया हुनिं हे सहमति जुइमफुगु द्वपं नं बियादिल ।
अथेहे वरिष्ठ अधिवक्ता शम्भु थापां हिटलर व बाबुरामय् छु नं मपागु बिचाः प्वंकादिल । म्हिगः आन्दोलनय् नापं वंपिं मधेशवादीतय्त नं आन्दोलनय् नापं यंकेत वय्कलं दलतय्त सुझाव बियादिल ।
पुलांम्ह सभामुख दमननाथ ढुङगानां वइगु वैशाख तक निर्वाचन जुइमफुत धाःसा सात सालनिसें पन्ध्र सालया पुनरावृति जुइगु शंका प्वंकादिल । वय्कलं न्ह्यावलें आन्दोलनय् जक वनेगु कि देय् निर्माणय् नं वनेगु धइगु न्ह्यसः थनादिल । प्राध्यापक वीरेन्द्रप्रसाद मिश्रं संविधानसभायात संसद दयेकूगु हुनिं संविधान दयेके मफुगु बिचाः प्वंकादिल ।
संयुक्त राष्ट्रसंघया पुलांम्ह सहायक मूछ्याञ्जे कुलचन्द्र गौतमं जनताया राजनीतिप्रति वितृष्णा ब्वलनावःगु धयादिसें दलतय्त जनताया न्ह्यःने वनेन्ह्यः दीर्घकालिन व अल्पकालिन ज्याझ्वः न्ह्यःब्वयेत सुझाव बियादिल ।
