पाटन अस्पतालया आन्दोलन तच्वल
पाटन स्वास्थ्य विज्ञान प्रतिष्ठानया उपकुलपति संगिता भण्डारी व शिक्षाध्यक्ष सोम्या भट्टाचार्यया राजिनामा माग याना थ्यंमथ्यं स्ववाः निसें आन्दोलनय् कुहांवःपिं आन्दोलनरत चिकित्सक लिसे कर्मचारीतय्सं थःपिनिगु आन्दोलनयात अझ तच्वयेकीगु जूगु दु ।
उमिसं थःपिनिगु मागया छु नं सुनुवाई मजूगु न्ह्यःथना अस्पतालया आकस्मिक सेवा बाहेक मेमेगु सेवा ठप्प याःगु दु । आन्दोलनरत कर्मचारी लिसे चिकित्सकतय्सं प्रतिष्ठानया भिसी व रेक्टरया ज्याकुथिइ तालं नापं ग्वयाः बिउगु दु ।
ताः ई तक नं अस्पतालय् न्ह्यानाच्वंगु आन्दोलन क्वःमचायेवं सरकारं समस्या समाधान यायेत प्रधानमन्त्री ज्याकूया छ्याञ्जे कृष्णहरि बास्कोटायात जिम्मेवारी बिउसां नं समस्याया सुनुवाई मजूगु न्ह्यःथना आन्दोलनरत कर्मचारीतय्सं आन्दोलनयात अझ तच्वयेकूगु खः ।
प्रतिष्ठानय् दक्ष चिकित्सक दयेक दयेकं नं पिनें हयाः शिक्षाध्यक्ष नियुक्त याःगु न्ह्यःथना चिकित्सक व कर्मचारीत आन्दोलनय् कुहांवःगु खः ।
उखे प्रतिष्ठानया उपकुलपति संगिता भण्डारीं धाःसा थःम्हं प्रतिष्ठानया हिसाब किताब पारदर्शी यायेत माग यानावलय् कर्मचारीत आन्दोलनय् कुहांवःगु दाबी यानादीगु दु ।
