संविधानय् 'जनयुद्ध' शब्दया पलेसा 'सशस्त्र युद्ध' च्वइगु
संविधानसभाय् न्ह्यब्वयेगु संविधानसभा साँस्कृतिक व सामाजिक ऐक्यबद्धता आधार निर्माण समितिया अवधारणपत्रय् जनयुद्ध धइगु खँग्वःया पलेसा सशस्त्र युद्ध तइगु जूगु दु । समितिया थौं च्वंगु बैठकय् अवधारणा पत्रय् माओवादी जनयुद्ध तयेगु मतयेगु विषयसं विवाद पिदनेवं लिपांगु क्वःछिनाया नितिं मतदान जूगु खः ।
बैठकय् ब्वति दुपिं स्वीनिम्ह सभासद मध्ये झिंनिम्हसिनं जनयुद्ध तयेगु पक्षय् व झिंगुम्हसिनं सशस्त्र युद्ध तयेगु पक्षय् मतदान याःगु खः । छगू मत धाःसा तटस्थ जूगु खः । समितिइ पीनिम्ह सभासद दुसां नं थौंया बैठकय् स्वीनिम्ह सभासदया जक ब्वति दुगु खः । बैठकय् एमालेया सभासद् रणबहादुर लिम्बूं माओवादीं झिदँया युद्धय् भौतिक संरचना नष्ट यायेगुया लिसलिसे ज्यादती याःगु द्धपं ब्यूसें युद्धयात जनयुद्ध धाये मफइगु धायेवं ब्वति दुपिं सभासदतदथुइ भनाभन जूगु खः । एमालेया उगु धापूया खण्डन यासें माओवादी सभासद कालिबहादुर मल्लं युद्धकालय् माओवादीं मजूसे कांग्रेस व एमालें हत्या बलात्कार व बेपत्ता यायेगु ज्या याःगु धयादीगु दु ।
संविधानसभाय् विवाद अप्वया वनेवं अवधारणा पत्र तयार यायेगु भुवलय् मतदान जूगु थ्व न्हापांगु घटना खः ।
