नेपाल संवतयात लेटरप्याडय् छ्यलेगु जुइ : प्रधानमन्त्री भट्टराई
प्रधानमन्त्री डा. बाबुराम भट्टराईं थःम्ह प्रधानमन्त्रीया हैषियतं च्वयेगु लेटरप्याडय् नेपाल संवत् छ्यलेगु बचं बियादीगु दु । 'प्रधानमन्त्रीया हैषियतं यायेगु फुक्कं पत्राचार नेपाल संवत् छ्यलेगु जुइ', प्रधानमन्त्री भट्टराईं धयादिल ।
नेपाल संवत् ११३३ न्हूदँया लसताय् येँया चकंदबूली जूगु सभायात सम्बोधन यानादिसें वय्कलं प्रधानमन्त्रीया हैषियतं जक मखु मेगू छु छु क्षेत्रय् थुगु संवतयात छ्यलेफइगु उगु क्षेत्रय् नं नेपाल संवतयात अंकित यायेगु निंतिं प्रयत्नशील जुइगु न्ह्यःथनादिल ।
न्हूदँ राष्ट्रिय समारोह समितिपाखें ग्वसाःग्वःगु उगु सभाय् प्रधानमन्त्री भट्टराईं नेपाल संवत् छ्यलेगु निंतिं दच्छि न्ह्यः नीस्वंगु आयोगपाखें शिफारिस याःगु सुझाव कार्यान्वयन यायेगु नं प्रतिवद्धता प्वंकादिल ।
अथेहे वय्कलं नेपाल संवत् व शंखधर साख्वाःया बारे अध्ययन अनुसन्धान यायेत राष्ट्रिय स्तरया प्रतिष्ठान नीस्वनेगु व आक्यवंनिसें नेपाल संवतया लसताय् सार्वजनिक
बिदा बिइगु बारे मन्त्रीपिरषदं याकनं निर्णय जुइगु धयादिल ।
नापं नेपाल संवतयात नेपाः सरकारयापाखें आधिकारीक रुपं हनेगु पाखे नं याकन निर्णय जुइगु नं धयादिल ।
अथेहे न्हूदँ समरोह समिति ११३३ यलं यलया लाय्कूली याःगु सभायात सम्बोधन यानादिसें आः नं प्रत्येक नेपाःमिया दरं झिंन्याद्वः त्यासाः दुगु धयादिसें थःज्यागु इलय् शंखधर साख्वःयात लुमंकाः देय्यात आर्थिक विकासपाखे यंकेमाःगु न्ह्यःथनादिल ।
