नेपाल सम्वत ११३३ न्हूदँ सुरू
थौं नेपाल सम्वत् न्हूदँ ११३३ । थनिंनिसें नेपाःया मौलिक सम्वत् नेपाल सम्वत् ११३३ न्ह्यागु दु ।
नेपाःमि जनताया ऋण पुलाः राष्ट्रिय विभूती शंखधर साख्वालं तत्कालिन जुजु राघवदेवया इलय् (ईश्वी सम्वत् ८७९ अक्टोबर २०, वि.सं. ९३६) सं देय्या नामं पलिस्था याःगु खः । थ्व सम्वत् हरेक दँ कात्तिक शुल्क परेवाया दिं हिली ।
नेपाल सम्वत् ११३३ न्हूदँया लसताय् थौं थीथी ज्याझ्वः यानाः सांस्कृतिक र्यालीलिसे देय्न्यंक भिंतुना कालबिल यायेगु याइसा थौं हे न्हूदँया लसताय् मोटरसाइकल र्याली नं थीथी खलःपुचःपाखें ग्वसाः ग्वयाः न्ह्याकाः वयाच्वंगु दु ।
राष्ट्रिय सम्वत् नेपाल सम्वत्यात औपचारिक रुपं मान्यता दयेधुंकूगु अवस्थाय् हरेक दँ न्हूदँ समारोह समितिं भिंतुना र्याली नापं पिकाःगु दु । भिंतुना र्याली येँया थीथी थासय् चाःहिलाः क्वचाइगु ग्वसाः खलकं जानकारी ब्यूगु दु ।
अथेहे भिंतुना र्याली यल, ख्वप, किपू, पाँगा, इटागोल, थिमि लगायत थासय् नं थीथी ज्याझ्वः यानाः हनेगु तयारी जुयाच्वंगु दु ।
छगू सञ्चारमाध्यमलिसे खँल्हानादिसें नेपाः सः वाःपौया सम्पादक भाजु सुभाषराम प्रजापतिं जानकारी बियादीकथं अमेरिका, जापान, कोरिया, बेलायत, अष्ट्रेलिया लगायत थीथी देशय् नं न्हूदँया लसताय् थीथी ज्याझ्वः ग्वसाः ग्वयेगु तयारी जुयाच्वंगु जानकारी बियादिल ।
थ्वहे दथुइ राष्ट्रिय विभूती शंखधर साख्वाः प्रतिष्ठानं राष्ट्रिय सम्वत् मान्यता प्राप्त नेपाःया मौलिक नेपाल सम्वत्यात सरकारी ज्याख्यलय् न्ह्याकेत माग याःगु दु । प्रतिष्ठानं विज्ञप्ती पिकयाः न्हूगु दयेकीगु संविधानय् ‘सम्वत् नीति’या स्पष्ट रुपं न्ह्यःथनेमाःगु जानकारी ब्यूगु खः ।
विज्ञप्तिइ नेपालय् मनूया जन्मपत्र, रीतिरिवाज, संस्कार कर्म, धार्मिक, सामाजिक ज्यात नेपाल सम्वतया हे आधारय् न्ह्यानावःगु व मध्यकालया वंशावली, अभिलेख, थ्यासफू, ऐतिहासिक दस्तावेजत, सन्धी सम्झौताय् नेपाल सम्वत् छ्यलातःगु लुयावःगु न्ह्यःथनातःगु दु ।
नेपाःया म्हसीका क्वःबियाच्वंगु, जनस्तरपाखें पलिस्था याःगु व जनजीवनलिसे स्वानाच्वंगु थ्व सम्वत् राष्ट्रिय निधी जूगु नं प्रतिष्ठानं जानकारी ब्यूगु खः । हरेक दँ कात्तिक शुल्क परेवाया दिं थ्व सम्वत् हिली ।
नेपाल सम्वत्या प्रवर्तक राष्ट्रिय विभूती शंखधर साख्वालं राष्ट्रप्रति क्यंगु प्रेम, सामाजिक व आर्थिक क्रान्तिया नितिं याःगु ज्याया बारे फुक्क नेपाःमिपिंत सुसूचित व प्रेरित यायेत पाठ्यपुस्तकय् दुथ्याकेत नं प्रतिष्ठानं माग याःगु दु ।
विज्ञप्तिइ नेपाल सम्वत्यात सरकारी प्रचलनय् हयेत उच्च स्तरीय समिति नीस्वनेमाःगु, अध्ययन अनुसन्धानपाखें उपलब्ध जूवःगु ज्वलंत सङ्कलन यानाः संग्रहालय पलिस्था यायेमाःगु, शंखधरया नामय् राजमार्ग नामाकरण यायेमाःगु व प्रतिष्ठानयात राष्ट्रिय मान्यता बियाः नियमित अनुदानया व्यवस्था यायेमाःगु न्ह्यःथनातःगु दु ।
थ्वहे झ्वलय् प्रधानमन्त्री डा. बाबुराम भट्टराई, राष्ट्रपति डा. रामबरण यादव लगायत थीथी राजनीतिक पार्टीं नं नेपाल सम्वत् ११३३ न्हूदँया लसताय् देशबासीया नामय् भिंतुना देछायादीगु दु ।
