थनिंनिसें न्ह्यात स्वन्ति नखः, क्वः पुजा कन्हय्
नेपाःमिपिनिगु निगूगु तःधंगु नखः स्वन्तिया न्हापांगु दिं थौं क्वः पुजा यानाः हनाच्वंगु दु । कात्तिक कृष्णपक्ष त्रयोदशिनिसें कात्तिक शुक्ल द्वितियातक्क न्यान्हुयंकं हनीगु यमपञ्चकया न्हापांगु दिं थौं छेँ–छेँय् क्वःयात यमदूतया रुपय् पुजा यानाः क्वः पुजा हनेगु यानाच्वंगु खः ।
पौराणिक बाखं कथं आश्विन कृष्ण द्वादशिया दिं गणेद्यः व किसिया पुजा याइसा थौं त्रयोदशिया दिं क्वःया पुजा याइ । थौं पञ्चक न्ह्याइगु दिं न्ह्याइगु जूसां नं थुगु दँ म्हिगः हे सुथंनिसें त्रयोदशि क्यंगु खः ।
अथेहे कन्हय् खिचा पुजा व लक्ष्मी पुजा छन्हुं हे लाःगु दु । कन्हय् सुथय् चतुदशि व सनिलय् छेँ–छेँय् धनया द्यः लक्ष्मीया पुजा आराधना याइ ।
बुधबाः गोबद्र्धन व गोरु पुजा याइसा नेवाःतय्सं धाःसा उगु हे दिं बहनी म्ह पुजा अर्थात आत्मा पुजा यायेगु याइ । लिपांगु दिं बिहीवाः किजा पुजा यायेगु याइ ।
