एमाले स्थायी व केन्द्रीय समितिया बैठक
स्वघौ ताःहाकःगु सहलहलिपा नं सरकारय् ब्वति काईपं मन्त्रीतय्गु नां क्वःछुइमफुगु नेकपा एमाले स्थायी समितिया बैठक आः हाकनं च्वनाच्वंगु दु । पार्टी मुख्यालय बल्खुइ न्हापांगु चरणय् करिब स्वघौ च्वंगु बैठकय् दलदुने खनेदुगु संस्थापन प्रधानमन्त्री व केपी ओली धार थःथःगु अडानय् च्वनेवं मन्त्रीमण्डलय् छ्वयेगु नां क्वःछुइमफुगु खः । थ्व स्वयां न्ह्यःया सहलहसं एमाले नायः झलनाथ खनालं सरकारय् वनेगु नितिं पूर्वांचल व जनजातिया प्रतिनिधित्व यासें रकम चेमजोङ मध्यमांचल मधेश व दलित समुदायया प्रतिनिधित्व यासें सत्यनारायण मण्डल पश्चिमांचलपाखें जनजातिया प्रतिनिधित्व यासें दलबहादुर रानायात प्रस्ताव याःगु खः । अथेहे मध्यपश्चिमांचल व कर्णालीया प्रतिनिधित्व यासें डिल्लीबहादुर महत व राज्यमन्त्रीइ गरिमा शाहयात प्रस्ताव याःसां नं उपिं फुक्क नांयात प्रधानमन्त्री माधवकुमार नेपालं तप्यंक अस्विकार यायेवं एमालेय् विवाद वःगु स्रोतं जानकारी ब्यूगु दु । नायः खनालं याःगु प्रस्तावयात प्रधानमन्त्री नेपालं अस्विकार यायेवं खनालं छिः छु छु यः वहे यानादिसँ धइगु लिसः वयेवं मन्त्री परिषद्य् छ्वयेत दुजः ल्ययेत लिबाःगु स्रोतया दावी दु । उखे पार्टीया मेगु धारया नेतृत्व याःम्ह केपी शर्मा ओलीं विष्णु पौडेल भिम रावल शंकर पोखरेल व रघुविर महासेठयात सरकारय् छ्वयेगु प्रस्ताव याःसां नं समावेशी जुइमफइगु संस्थापन पक्षं दावी याःगु दु । प्रधानमत्री माधव नेपालं ईश्वर पोख्रेल अशोक राई युवराज ज्ञवाली मध्ये छम्हेसित छ्वयेत इनाप याःसां नं संस्थापन पक्ष उकिइ असहमत खनेदुगु खः । संस्थापन पक्षया छम्ह नेतां धाःसा इतिहासय् प्रधानमन्त्रीया नां दर्ता यायेत वंम्ह माधव नेपाल सरकार ल्यंकाः तयेगु कासाय् जक वंगु द्धपं ब्यूगु दु ।
अथेहे एमाले केन्द्रीय कमिटिया बैठक धाःसा कन्हय्या नितिं सःतूगु दु । कार्यविभाजन वार्षिक कार्ययोजना लगाएतया विषयसं केन्द्रीत जुइगु धाःसां नं बैठकं मन्त्रीमण्डलय् वनीपिं दुजःतय्गु नांधलः निर्वाचन मार्फत क्वःछुइगु सम्भावना दुगु छम्ह केन्द्रीय दुजलं जानकारी ब्यूगु दु ।
