येँय् कांग्रेसया शक्ति प्रदर्शन
मदुम्ह नेता गणेशमान सिंहया ९७क्वःगु बन्हिया झ्वलय् नेपाली कांग्रेसं बसन्तपुर डबली आमसभा याःगु दु । शान्ति वाटीय् दुगु गणेशमान सिंहया सालिकय् स्वाँमाः क्वःखायेकाः न्ह्याःगु जुलुस बागबजाः, पुतलीसतक, भृकुटीमण्डप, न्हू सतक जुया बसन्तपुली सभाय् परिणत जूगु खः । काग्रेसं थुगु सभायात सरकार विरुद्धया शक्ति प्रर्दशनया कथं काःगु दु ।
सभायात सम्बोधन यासें कांग्रेस सभापति सुशील कोइरालां कांग्रेसं सरकार विरोधी आन्दोलन न्ह्याकूगु उद्घोष यानादिल । वय्कलं थःपिनिगु आन्दोलन शान्तिपूर्ण जूगु न्ह्यथंसें सरकार विरोधी आन्दोलन जूसां सहमितया निंतिं वार्ताया लुखा नं चायेकाः तयेगु धयादिल ।
महामन्त्री प्रकाशमान सिहं नेपाली कांग्रेसं न्ह्याःकुगु शान्ति प्रक्रिया सफल यायेत कांग्रेस छुं भचा लचक जूगु धासें थ्व लचकतायात कमजोरी कथं मकायेत ख्याच्वः बियादिल । अथेहे मेम्ह महामन्त्री कृष्णप्रसाद सिटौलां वर्गिय व जातीय मुद्दा ल्ह्वना देय्यात विखण्डन यायेगु माओवादीया चाल जूगु धासें कांग्रेस राष्ट्रिय एकता सहितया संघीयता नीस्वनेगु पक्षय् दुगु कनादिल ।
सभायात सम्बोधन यासें कांग्रेस येँ जिल्ला सभापति भिमसेनदास प्रधानं जनता विपक्षी नापं मदुगु धाइम्ह सत्तारुढ दलयात बसन्तपुली वःगु कांग्रेसया आमसभा स्वयेत चुनौती बियादिल । नापं वय्कलं सहमति यानाः देय्यात निकास बिइमाःगु खँ धयादिल ।
अथेहे कांग्रेसका केन्द्रीय दुजः भीमबहादुर तामाङं नेपालय् विदेशी हस्तक्षेप अप्वः जुगू धासें विदेशी एजेण्टतय्सं नेपाःया व्यवस्था खल्बल याःगुलिं जनतां अज्याःपिं दण्डित यायेगु ई वःगु व राष्ट्रिय अस्मिताया रक्षया निंतिं कांग्रेस न्ह्याः वनेमाःगु खँ धयादिल ।
सभायात कांग्रेसया वरिष्ठ नेता शेरबहादुर देउवा, उपसभापति रामचन्द्र पौडेल, कोषाध्यक्ष चित्रलेखा यादव लगायत नं सम्बोधन याःगु खः ।
