प्रधानमन्त्रीपाखें नं बिचाः हायेकल
नेवाः देय् दबूया संरक्षक भाजु मल्ल के.सुन्दरया मां व नेपालमण्डल डटकमया दुजः भाजु अस्मित मल्लया अजि मय्जु तुलसीमाया मल्ल मदुगु दुःखय् प्रधानमन्त्री बाबुराम भट्टराईं नं बिचाः हायेकादीगु दु । मल्ल शुक्रवाः थःगु हे छेँय् थाय्मदुइ सुथसिया ११:०७ ताः इलय् मदुगु खःसा प्रधानमन्त्री भट्टराई शनिवा: मल्लया छेँय् वनां बिचाः हायेकादीगु खः ।
प्रधानमन्त्री भट्टराईलिसें एमाओवादी नेता पुष्पकमल दाहाल 'प्रचण्ड', प्रधानमन्त्रीया जहान व एमाओवादी नेतृ हिसिला यमि, नेकपा–माओवादी नायः मोहन वैद्य 'किरण', नेता हितमान शाक्य, जनजातिनेता परशुराम तामाङ्ग, नेवाः देय् दबूया संरक्षक लक्ष्मण राजवंशी, नेवाः देय् दबूया नायः नरेश ताम्राकार, जनकवि दुर्गालाल श्रेष्ठ, वरिष्ठ पत्रकार रमेशकाजी स्थापित, सह–प्रा. डा. चुन्दा वज्राचार्य लगायत आपालं जनजाती नेता कार्यकर्तापिं व नेपालभाषा ख्यःया आपालं नेता कार्यकर्तापिं शनिवाः मल्लया छेँय् वना बिचा: हायेकादीगु दु ।
आइतवाः नं नेपालमण्डल डटकमया पदाधिकारीपिं, साहित्यकार ज्ञानकाजी मानन्धर, कवि राजभाई जःकःमि, ज्यापु समाज, यलया नायः मंगल महर्जन लगायत आपालं भाषिक नेता कार्यकर्तापिं मल्लया छेँय् वना बिचाः हायेकादीगु दु ।
मदुम्ह मल्ल ९७ दँ दुम्ह खःसा वय्कःया अन्त्येष्टी शुक्रवाः हे पशुपति आर्यघाटय् जूगु खः ।
