थिमिया तलेजुइ बजेट अभावं मजुल कोत पुजा
बजेट अभावया हुनिं हरेक दँ मोहनिया लसताय् मध्यपुर थिमि, लाय्कू दरबारसं च्वंगु तलेजु देगः न्ह्यःनेया कोतय् बलि बीमाःगु परम्परा थुगु दँ त्वाःदःगु दु ।
मध्यपुर थिमि – १२ सं दुगु उगु तलेजु देगः न्ह्यःने हरेक र्दँ नवमिया दिं मेय् व दुगुया बलि बीमाःगु तर थुगु दँ सम्बन्धित निकायपाखें माःगु बजेट मवःगु हुनिं बलि बीमखंगु तलेजुया थकाली श्याम पमां जानकारी बियादीगु खः ।
जात्रा पर्वया नितिं अर्थ मन्त्रालयपाखें मालपोत ज्याकूपाखें बजेट निकासा जुइमाःगु प्रचलन दु । वंगु दँ बलि पुजाया नितिं नीनिद्वः तका धेबा निकासा जूगु खः । बिहीवाः जूगु खड्ग जात्रा अर्थात् कुभिण्डो जात्रा नापं प्रभावित जूगु स्थानीयबासीं जानकारी ब्यूगु खः ।
तलेजुया पुजारी हरिमान कर्माचार्यं जात्रा पर्व न्ह्याकेगु नितिं माःगु बजेट सम्बन्धित निकायं बिना झन्झट उपलब्ध याकेमाःगु माग यानाः यदि थुकथं निकासा मयायेगु खःसा मेमेगु संस्कृति नापं न्हनाः वनीगु च्यूताः प्वंकादीगु खः ।
न्हापा न्हापा मेय् न्ह्यम्ह, दुगु न्ह्यम्ह व हँय् नापं बलि बीमाःगुलिइ लिपा वयाः मेय् छम्ह व दुगु छम्ह जक बलि बीगु यानाः वःगु स्थानीयबासी आः थ्व नं त्वाःदलेवं मेगु दँ गुकथं नख हनेगु धइगु च्यूताः अप्वःगु धयादीगु खः ।
