थौं चालं
मोहनीया झिन्हुया न्हि थौं कौलाथ्व दशमि अर्थात चालं । मोहनी नखःया मू न्हि । म्हिगः थापं याःगु ज्याभःयात थौं पुजायाना क्वकाइगु खः । थनिंनिंसें थःसिबें थकालिपिनिपाखें मोहनी सिन्हःतिना सुवा: कायेगु चलन नं दु ।
थ्वहे दथुई मोहनीया लसताय् राष्ट्रपति डा.रामबरण यादवं थःथवय् सद्भाव व सामाजिक ब्व थुगु मोहनी नखःया लसताय् देय् व विदेशय् च्वंच्वनाच्वंपिं सकल तःकेहेँपिंत सुख, शान्ति जुयेमा धकाः भिंतुना बियादीगु दु ।
राष्ट्रपति डा. यादवं मोहनी ११३२ या लसताय् बुधवाः बियादीगु भिंतुना हसनाय् व्यक्ति, परिवार व समाजयात चिनाःतइगु मोहनीथें जाःगु नखःयात झीसं साँस्कृतिक व धार्मिक कथं जक मस्वःसे मंकाः राष्ट्रिय सम्पदाया मिखां नं स्वयेमाःगु, थुइकेमाःगु व ल्यंकाः तयेमाःगु ई वःगु न्ह्यथनादिल ।
भिंतुना हसनाय् राष्ट्रपतिं धयादीगु दु राजनीतिक कुतः न्ह्याक्व हे ताःमलाःसां लोकतान्त्रिक संविधान कायेगु नेपाली जनताया ईच्छा व अधिकार गुगुकथंनं खण्डित व कुण्ठित जुइ मखु व नेपाली जनताया न्ह्यज्यांवनेगु पलाः मदिक्क न्ह्यःने वनेगु खँय् जि विश्वस्त जुया ।
राष्ट्रपति डा. यादवं थःगु भिंतुना हसनाय् ऐतिहासिक जनआन्दोलनं वःगु महत्वपूर्ण उपलब्धियात ल्यंकाःतसें समृद्ध नेपाल दयेकेगु लँय् न्ह्याःवनेत दुर्गाभवानीं झीसकलसित सुवाः ब्यू धकाः कामना नं यानादीगु दु ।
