बिराट नेपालभाषा साहित्य सम्मेलन थ्वपालय् बिस्कं पहलं न्ह्याइगु

बिराट नेपालभाषा साहित्य सम्मेलन थ्वपालय् बिस्कं पहलं न्ह्याकेत्यंगु दु। थ्वपालय् वइगु कौलाथ्व द्वादशी व त्रयोदशी खुनु ख्वपया सूर्यबिनायकय् च्वंगु ट्रलीबसपार्कय् ५१क:गु बिराट नेपालभाषा साहित्य सम्मेलन जुइत्यंगु दु।

थगुने विराट नेपालभाषा साहित्य सम्मेलनया लुँबुदिं हनेधुंका: विराटया छगू अध्याय क्वचा:गु व थ्वपालंनिसें न्हू पहलं साहित्य सम्मेलन न्ह्याइगु विराट नेपालभाषा साहित्य सम्मेलन गुथिया नाय: त्रिरत्न शाक्यं धयादिल। बिराटं इतिहास दयकेधुंकूगु जूसां सम्मेलन न्ह्याकेत न्हू पुस्तां उलि च्यूता: मका:गु खनेदुगुलिं थ्वपालंनिसें बिराटयात न्हूपुस्ता केन्द्रीत यानायंकेगु ग्वसा: दुगु वयकलं कनादिल। थ्व पालय् बिराटं साहित्यिक धेंधेंबल्ला वइगु फागुनं जक यायत्यंगु दु सा वइगु शुक्रवार सम्मेलनया न्हापांगु दिनय् वरिष्ठंनिसें न्हूपिं च्वमिपिनिगु रचना पाठ याकेगु ज्याझ्व: दुगु नाय: शाक्यं कनादिल। थुकथंया ज्याझ्वलय् नेपालभाषा साहित्यया धा: व प्रवृत्ति गुखे वनाच्वन धका: सीकेफैगु वयकलं कनादिल।

अथेहे, थगुने लुँबुदिंबले जूगु साहित्यिक धेंधेंबल्लाय् त्याकूपिन्त सिरपा नं शुक्रबा: हे इनेत्यंगु दु सा नेपालभाषा बिषय कया: एसएलसीइ दकलय् अप्व: ल्या: हयादीम्ह किपूया हिलटाउन स्कूलया रूपा महर्जनयात सिरपा नं ल:ल्हायगु ज्याझ्व: दु। संञ्चरबार निन्हुया दिनय् नेवा: म्हसिका लिसें संस्कृतियात कया: वृहद् अन्तर्क्रिया जुइगु शाक्यं कनादिल। नेवा: आन्दोलनया गन्तव्य छु धका: क्व:छीमफयाच्वंगु इलय् नेवा: संस्कृतिइ खनेदयाव:गु आधुनिकीकरणंया प्रभाव लिसें नेवा:त गुखे न्ह्यांवनेगु धैगु खँय् अन्तर्क्रिया जुइगु वयकलं धयादिल।