न्हूदँ राष्ट्रिय समारोह समिति ११३३ नीस्वन
नेपाल संवतया न्हूदँ ११३३ हनेत ई. मोहनकृष्ण डंगोलया अध्यक्षताय् न्हूदँ राष्ट्रिय समारोह समिति ११३३ नीस्वंगु दु ।
येँय् जूगु छगू ज्याझ्वःया दथुइ ई. डंगोलया अध्यक्षताय् स्वीखुम्ह दुजः दुगु समिति नीस्वंगु खः । समितिं नेपाल संवतयात व्यवहारिक रुपं नेपाःया फुक्कं समुदाय दथुइ प्रचलनय् हयेत पहल यायेगु खँ धाःगु । उगु समितिया सल्लाहकार कथं पद्मरत्न तुलाधर, लक्ष्मीदास मानन्धर नापं न्हापाया न्हूदँ समारोह समितिया अध्यक्षत च्वनादीगु दु ।
उगु ज्याझ्वःया दथुइ समितिइ दुथ्याःपिं दुजःत दथुइ थीथी कवः नीस्वना ज्या भाला इनेगु ज्या नं जूगु खः । भाला कथं मिटिङ व्यवस्थापन व समिति अनुगमनय् सुजीव वज्राचार्य, राजेश शाक्य व सरिता महर्जन, आर्थिक समितिइ राजेन्द्रमान शाक्य व अमृतरत्न ताम्राकार, सांस्कृतिक समितिइ पंचनारायण महर्जन, सुनिता महर्जन, बद्रीनारायण मानन्धर व रजिना डंगोल च्वनादीगु दु ।
अथेहे देय्न्यंक जुइगु न्हूदँ सम्बन्धि ज्याझ्वःया संयोजन यायेगु भालाः नरेश ताम्राकार, गजेन्द्र मानन्धर, के.बी. घजु, जितेन्द्र विलास वज्राचार्ययात बिउगु दु । प्रतिनिधिमण्डल संयोजन यायेत डा. ज्ञानेन्द्र तुलाधर व सविता महर्जन, याली व्यवस्थापन समितिइ उमेश स्थापित, राजेन्द्र महर्जन व प्रेरणा शाक्य, नेपाः पिने हनीगु न्हूदँया संयोजनया जिम्मा रश्मिला प्रजापति व रजनी मिलायात बिउगु दुसाः मिसा समितिइ नानीहेरा महर्जन, विमला महर्जन व दुर्गादेवी ताम्राकार, मंच व माइक व्यवस्थापनय् शैलेश शाक्य, माइलाबाबु द्यःला, सरोज श्रेष्ठ व विगेन तुलाधर च्वनादीगु दु ।
संचार नापं प्रचार प्रसार समितिया भालाः उदेन न्हूसाय्मि व नृपेन्द्रलाल श्रेष्ठ नापं नेवाः पत्रकार राष्ट्रिय दबूयात बिउगु दु ।
