भारतिय लोकंह्वाःम्ह निर्देशक यश चोपडा मन्त
भारतिय लोकंह्वाःम्ह संकिपा निर्माता व निर्देशक यश चोपडा ८० दँया बैंशय् आइतवाः मन्त । 'जब तक है जान'यात थःगु लिपांगु संकिपा धकाः घोषणायासें संकिपा ख्यलं सन्यास काःगु छुं न्हि लिपा हे बान्द्राय् च्वंगु लिलावती अस्पतालय् वय्क मदुगु खः ।
लोकंह्वाःम्ह निर्देशक थः दाजु बि.आर. चोपडायात ग्वहालीयायां हे संकिपा ख्यलय् दुहांझाःम्ह वय्कलं दिवार, सिलसिला, कबिकबि, लमहे, चाँदनी, त्रिशुल, डर, दिल तो पागल हे, वीरजाराथें जाःगु लोकंह्वाःगु संकिपा दयेकादीगु खः। वय्कयात रोमान्सया राजा नं धायेगु या: ।
थःगु जीवनया न्यागू दशक थुगु संकिपा ख्यलय् पानादीम्ह वय्कलं खुगू नेशनल फिल्म अवार्डलिसें झिंछगू फिल्मफेयर अवार्ड त्याकादीगु दुसा थुकी मध्ये प्यंगूला उत्कृष्ट डाइरेक्टरया सिरपा: खः । संकिपा ख्यलय् योगदान यानादीगुलिं वय्कयात 'दादासाहेव फल्के अवार्ड २००१' व पद्मभूषण २००५ पाखें नं विभूषित यानातःगु खः ।
वय्कःया जहान पामेलालिसें निम्हं कायपिं आदित्य व उदय् नं भारतीय संकिपा ख्यलय् हे ज्यायानाच्वनादीपिं खः ।
