माइतीघरनिसें भद्रकालीतक्कया लँपु चाल
सर्वसाधारणया सुविधाया नितिं थौंनिसें माइतीघरनिसें भद्रकालीतक्कया लँपु चायेकूगु दु ।
नेपाली सेनां छगू करोड नीन्यागू लख तकाया लागतय् सुरक्षा पःखाःलिसे ग्राबेल यानाः तयार याःगु थ्व लँपुया भौतिक योजना लिसे निर्माण मन्त्री हृदयेश त्रिपाठीं थौं उलेज्या यानादीगु ख ।
मन्त्री त्रिपाठीं थ्व लँपु चालेधुंकाः सिंहदरबार लागाय् यातायात सञ्चालनय् सहजता वइगु धयादिसें थुकियात याकनं स्तरोन्नति यायेत उजं बियादीगु दु ।
सुरक्षाया हुनिं द्वन्द्वकालनिसें हे सेनां माइतीघरपाखें भद्रकाली वनेगु नितिं उगु लँपुइ प्रतिबन्ध तयेवं सर्वसाधारणं सास्ती फयेमाःगु खः । नेपाली सेनां सुुरक्षाया हुनिं क्यनाः वैकल्पिक लँपु निर्माण यायेत प्रस्ताव याःगु खः ।
न्यासः व न्यय्गू मिटर ताःहाकःगु व झिगू मिटर ब्याःया थुगु लँपु झिंप्यंगू मिटरतक्क स्तरोन्नति याना प्यंगू लेनया दयेकीगु भौतिक योजना लिसे निर्माण मन्त्रालयया छ्याञ्जे तुलसीप्रसाद सिटौलां जानकारी बियादीगु खः ।
