नेपाल सम्वतयात आर्थिक दँ दयेकेमा : मन्त्री शाक्य
वातावरण, विज्ञान व प्रविधि मन्त्री डा. केशवमान शाक्यं नेपाःया आर्थिक दँ वैज्ञानिक मजूगुलिं विकास निर्माणय् प्रभाव लाःगु खँ धयादीगु दु ।
शङ्खधर वचत तथा ऋण सहकारी संस्था लिमिटेडया न्याक्वःगु दँ मुँज्याया उलेज्या यानादिसें मन्त्री शाक्यं आर्थिक दँ क्वचाइगु इलय् वा वइगु जूगुलिं सतक, ढः नापं निर्माण ज्या बजेट सिधेकेगु निंतिं जक जुइगु तर वा वइगुलिं निर्माण ज्या गुणस्तरीय मजुइगुलिं आर्थिक दँ परिवर्तन यायेमाःगु धयादिल ।
‘छगू करोडया निर्माण ज्या वा वइगु इलय् जुइगुलिं १० लख बराबरया ज्या जक बांलक जुइगु व ९० लख बराबरया ज्याय् भ्रष्टाचार जुयाच्वंगु दु’ वय्कलं धयादिल ।
नेपाःया विकासया निंतिं नेपाल सम्वतयात आर्थिक दँ दयेकेगु उपयुक्त जुइगुलिं थुकीयात व्यावहारिक रूपं लागू यायेमाःगु सुझाव वय्कलं बियादिल ।
ज्याझ्वलय् संस्थाया अध्यक्ष रत्नकृष्ण श्रेष्ठं संस्थाया वार्षिक प्रतिवेदन न्ह्यब्वयादिसें आर्थिक दँ ०६८-०६९य् संस्थां ६ लख ८२ हजार ५०३ नाफा यायेत ताः लाःगु धयादिल । (रासस)
