एमालेया ५१७ नेता व कार्यकर्तातय्सं पार्टी त्वःतल
नेकपा (एमाले) पहिचान सहितया संघीयताया सवालय् अनुदार जूगु धासें देय्न्यंया ५१७ नेता व कार्यकर्तातय्सं पार्टी परित्याग याःगु घोषणा याःगु दु ।
येँया राष्ट्रिय सभागृहय् जूगु छगू ज्याझ्वःया दथुइ एमाले उपाध्यक्ष अशोक राई सहित ६१ जिल्लाया नेता व कार्यकर्तातय्सं मंकाः कथं पार्टी परित्यागया घोषणा याःगु खः । उगु इलय् पार्टी त्वःतेमाःगु कारणया बारे श्वेतपत्र तकं जारी याःगु खः ।
राई नापं एमालेया राजेन्द्र श्रेष्ठ, मंगलसिद्धि मानन्धर, विजय सुब्बा, रिजवान अन्सारी, गोपाल ठाकुर, रकम चेम्जोङ, अजम्बर राई काङमाङ, हेमराज राई, माझीलाल थारु, वीर बहादुर लामा लगायतं पार्टी परित्यागया घोषणा यानादीगु खः ।
सभायात सम्बोधन यानादिसें राईं थःगु पहिचान स्वीकार मयाइगु पार्टीयात थःपिंसं नं स्वीकार मयायेगु धयादिसें अज्याःगु पार्टीइ च्वनाच्वनेगुया अर्थ मदुगु धयादिल । वय्कलं थःपिसं समानताया खँ ल्हायेगु इलय् संकुचित बिचाःया मनूतय्सं थःपिंत जातिवादी धइगु खना दया वंगु धयादिल ।
वैकल्पिक शक्ति निर्माण यायेगु घोषणा यासें एमालेया असन्तुष्ट नेतातय्सं ताः ई निसें अग्रगामी राजनीतिक पुचःया नामं देय्न्यंक भेला याना वयाच्वंगु खः । पार्टी परित्यागया घोषणा लिपा आः याकन हे संघीय समाजवादी नां तयाः न्हूगु पार्टीया घोषणा याइगु ज्याझ्वः दु । उगु पार्टीइ एमाले व कांग्रेस त्वःतुपिं आपालं नेता व कार्यकर्ता नापं जनजाति न्ह्यलुवाःतय् नं ब्वति दइगु खँ धाःगु दु ।
