दक्षिण कोरियाय् नेवाः भ्वय् न्यायेकल
कोरियाया तःधंगु नखः छुसकया लसताय् नेवाः पुचः, दक्षिण कोरियाया ग्वसालय् नेवाः भ्वय् न्यायेकूगु दु । थ्यंमथ्यं ७० म्हंस्वयां अप्वसिनं ब्वति कयादीगु थुगु भ्वय्या उलेज्या नेवाः वसः फिनातःपिं स्वम्ह मय्जुपिंसं मंकाः कथं यानादीगु खः। वंगु सेप्टेम्बर ३०, २०१२ खुन्हुया थुगु छुसक नखः कोरियालिपिंसं तसकं झःझः धायेक हंगु खः ।
गुरुज्यू नबीन वज्राचार्य व नेवाः पुचः, दक्षिण कोरियाया संस्थापक नायः मणिराज जोशीं मंकाःकथं नेवाःपुचःया आपतकालिन राहत कोष व नेपाल संवत् ११३३ न्हूदँया लसताय् लोकंह्वाःम्ह म्येहालामि भाजु दिपक वज्राचार्यया लाइभ कन्सर्टया टिकट छपाः छपाः कयाः भ्वय्या शुरुवाट यानादीगु खः।
ल्ववनापुसेच्वंगु नेवाः नसा ज्वलंलिसें स्थानिय कलाकारपिंसं न्ह्याइपुकूगु ज्याझ्वलय् प्रवासय् च्वनां नं नेवाः तजिलजि ल्यंकाः तयेगु ज्याय् योगदान यानादीगु च्वछायेबहःजू । नापं पुचःया ग्वसालय् जुइगु लोकंह्वाःम्ह म्ये हालामि दिपक वज्राचार्यं बांबांलाःगु म्ये लिसें न्ह्यब्वइगु कन्सर्टया टिकट कयादीत सकल कोरियावासी नेपाःमिपिंत याकनं हे सम्बन्धित व्यक्तियात स्वापूतया टिकट सुरक्षित यानादीत नं इनाप याःगु दु ।
किपा : नेवाः पुचः, दक्षिण कोरिया
